АҚШ Украинага энг катта ҳарбий ёрдам пакетини ажратди

Унинг қиймати қарийб 3 миллиард долларга баҳоланмоқда.

Фото: AP / Alex

АҚШ Украинага ҳарбий ёрдамнинг янги, энг катта пакетини ажратди, деб ёзди Associated Press АҚШ расмийларига таяниб.

«Пентагон ўз захираларидан қиймати тахминан 2,85 миллиард долларлик ҳарбий техникани ажратиб, Украинага юборади. Бу ҳарбий ёрдам пакетининг энг каттасидир», дейилади хабарда.

Киевга ҳарбий ёрдамнинг янги пакети 6 январ куни эълон қилинади ва у 50 га яқин Bradley пиёда аскарлар жанговар машинасини ўз ичига олади.

Бундан ташқари, мақсадли ёрдам пакетига Humvee ҳарбий машиналари, MRAP кўп мақсадли транспорт воситалари ҳамда «катта миқдордаги» ракеталар ва бошқа ўқ-дорилар киради.