Тошкентдаги кўп қаватли уйларда иссиқ сув ҳарорати вақтинча пасайтирилади

Тошкент шаҳри ҳокимлиги аҳолига мурожаат қилиб, электр тизимига юкламани пасайтириш ва марказлашган иссиқлик тизимида ҳароратни кўтариш учун кўп қаватли уйларнинг иссиқ сув таъминотида ҳарорат вақтинча пасайтирилишини маълум қилди.

«Тошкент шаҳрида ҳаво ҳарорати кескин пасайши оқибатида иссиқлик станцияларига узатилаётган табиий газ босими пасайиб кетиши сабабли хонадонларга етказиб берилаётган иссиқ сув таминотида ҳам, иситиш тизимида ҳам охирги кунларда ҳарорат сезиларли даражада пасайиб кетди.

Бунинг натижасида ўз хонадонларини иситиш мақсадида фуқаролар қўшимча электр мосламалардан фойдаланишга мажбур бўлмоқдалар.

Бу эса ўз навбатида трансформатор станциялари ва узатиш симларида нормадан ортиқча юкламани вужудга келтиряпти, бунинг оқибатида эса, охирги кунларда трансформаторлар ва симларда портлаш, ёниб кетиш каби авариялар сони кунлик ўн баробаридан ошиб кетди.

Шунга кўра, электр тизимига юкламани пасайтириш ҳамда марказлашган иссиқлик тизими (отопление)да ҳароратни кўтариш мақсадида, энг камида, уч кун давомида кўп қаватли уйларнинг иссиқ сув таъминотида ҳароратни вақтинча пасайтиришга мажбурмиз. Бунда сувни иситишга сарфланаётган табиий газ иссиқлик тизими (отопление)га йўналтирилади.

Вазиятни шаҳримиз фуқаролари тўғри баҳолашларига умид қиламиз ва келтирилган ноқулайликлар учун узр сўраймиз», дейилади хабарда.

Бундан ташқари, пойтахт аҳолисидан уйлардаги энг зарур хоналарни иситиш ва ёритишдан ташқари энергия сарфини имкон қадар камайтириш илтимос қилинган.