Навалнийнинг тарафдорлари #FreeNavalny кампаниясини бошлади

Россия мухолифати етакчиси Алексей Навалнийнинг тарафдорлари уни озод қилиш учун бутун дунё саъй-ҳаракатларини бирлаштириш мақсадида #FreeNavalny кампаниясини бошлади. Бу ҳақда Навалнийнинг қизи Дария 17 январь, сешанба куни Twitter'да маълум қилди.

Сиёсатчининг шерикларидан бири Леонид Волковнинг "Сирена" Telegram-каналида таъкидлашича, турли мамлакатларнинг расмий органлари Навалний ҳақида баёнотлар беряпти, шифокорлар ва адвокатлар уни қўллаб-қувватлаш учун очиқ хатлар имзолаяпти, аммо «сиёсий кампаниялар самаралироқ бўлади». Акцияга Германия молия вазири Кристиан Линднер ҳам қўшилди. «Россия раҳбарияти танқид ва эътирозлардан қўрқади. Шу қадарки, норозилик қамоққа олиб келиши мумкин. Бугун Навалний қамоққа олинганига роппа-роса икки йил бўлди. У ва унинг қаршилигини унутмаслик керак. #FreeNavalny», - деб ёзди германиялик сиёсатчи Twitter'да.

Кампания давомида мухолифатчига қарши янги жиноий ишлар, унинг Россия колониясида сақланаётган шароитлари, адвокатлар билан шахсий мулоқотга қўйилган тақиқлар ва соғлиғининг ёмонлашуви ҳақида маълумотлар тарқатилади. Бунинг учун «Навалнийга озодлик» сайти яратилди, у ерда сиёсатчи жамоаси билан боғланиш, «Путинга қарши курашиш учун» криптовалюта билан хайрия қилиш, Навалнийнинг штабига ва уни қўллаб-қувватлаш ҳаракатларига қўшилиш мумкин.

Навалнийнинг тарафдорлари таниқли шахслар ва оммавий ахборот воситаларини ўзларининг YouTube-каналида «Навалнийга озодлик» баннерини жойлаштириш орқали кампанияни қўллаб-қувватлашга таклиф қилишди. «Дождь» телеканали, Юлия Латинина, Михаил Ходорковский, Татяна Фельгенгауэр  ва бошқалар чақирувга аллақачон жавоб беришган.

Навалнийни қўллаб-қувватлаш кампанияси унинг Германиядан Россияга қайтганининг икки йиллиги муносабати билан бошланган, у ерда эса «Новичок» заҳарли моддаси билан ҳужумга учраганидан кейин даволанганди. Сиёсатчи 2021 йил 17 январь куни Москва аэропортида ҳибсга олинган ва ўшандан бери деярли 730 кун ҳибсда сақланмоқда.

Германиянинг Россиядаги элчихонаси ҳам сешанба куни россиялик мухолифатчини қўллаб-қувватлаб, Twitter'да чиқиш қилди.

Навалний сешанба куни Instagram'да Россияга қайтганининг икки йиллигини пост билан нишонлади: «Бизнинг бечора, қийноқларга учраган Ватанимизни қутқариш керак, у талон-торож қилинган, яраланган, тажовузкор урушга аралашган, энг виждонсиз ва ёлғончилар томонидан бошқариладиган қамоқхонага айланган. Бу тўдага қарши ҳар қандай қаршилик - ҳатто менинг ҳозирги чекланган имкониятларимдаги рамзийлик ҳам муҳим».

Мухолифатчининг қайд этишича, у «тўла ҳуқуқли фуқаро ва у каби фикрлайдиганлар билан бирлашишга, сиёсий фаолият юритишга ҳақли». «Биз кабилар кўп, порахўр судьялар, сохта тарғиботчилар ва Кремль ўғриларидан кўпроқ», деб ёзади у.

Навалний Владимир вилоятининг Мелехово шаҳридаги 6-сонли колонияда. 2021 йил февраль ойида суд унинг "Ив Роше" иши бўйича шартли жазосини ҳақиқий жазога алмаштириб, 2 йил-у 8 ойлик қамоқ тайинлади. 2022 йил мартида Навалнийга фирибгарлик иши бўйича яна 9 йил берилди: расмийлар сиёсатчи Коррупцияга қарши курашиш жамғармаси фаолияти учун йиғилган маблағни шахсий эҳтиёжлари учун сарфлаган, деб ҳисобламоқда. Ўтган йилнинг июнь ойидан бери "ИК-6" қамоқхонасида сақланаётган Навалний ўн марта жазо камерасига юборилган. 9 январь куни адвокат Вадим Кобзев сиёсатчи "иситма, йўтал билан" ЖИЗОда бўлганини айтди.

20 октябр куни Навалнийга қарши терроризмни тарғиб қилиш айби билан янги жиноий иш очилгани маълум бўлди. У, шунингдек, экстремистик фаолиятни молиялаш ва нацизмни реабилитация қилишда айбланмоқда.