G20 ташқи ишлар вазирлари якуний декларация бўйича келиша олмади

Россия ва Хитой Украинадаги урушни қораловчи, рус қўшинларини сўзсиз олиб чиқиб кетиш ва ядро қуролидан фойдаланишга йўл қўйилмаслиги талабини ўз ичига олган бандларга қарши чиқди.

Сергей Лавров / Фото: AP

G20 мамлакатлари ташқи ишлар вазирлари Ҳиндистон пойтахти Нью-Деҳлида бўлиб ўтган саммит якунларига оид баёнот бўйича келиша олмади. Бунинг ўрнига Ҳиндистон ўз коммюникесини чиқаради. «Украина можароси масаласида турли иштирокчилар ўртасида келишмовчиликлар бор, биз ҳал қила олмаган келишмовчиликлар бор эди», дея 2 март, пайшанба куни Ҳиндистон ташқи ишлар вазири Субраманям Жайшанкарнинг сўзларидан иқтибос келтирган AFP агентлиги.

«Ведомости» газетасининг ёзишича, якуний баёнот лойиҳаси 24 банддан иборат эди. Уларнинг учинчи ва тўртинчисига Россия ва Хитой биргаликда қаршилик кўрсатди. Лойиҳада Россиянинг Украинага қарши уруши қораланади, «Украина ҳудудидан (Россия қўшинларини) тўлиқ ва сўзсиз олиб чиқиб кетиш» талаб қилинади, ҳарбий ҳаракатларнинг жаҳон иқтисодиётига салбий таъсири, халқаро ҳуқуқ нормаларига риоя қилиш зарурлиги, қонунбузарликларга ва ядро қуролидан фойдаланишга йўл қўйилмаслиги ҳақида сўз боради.

Ўз навбатида, Россия ташқи ишлар вазири Сергей Лавров якуний ҳужжат имзоланмаганликда Ғарб давлатларини айблади. Унинг сўзларига кўра, Ғарб G20 декларациясида «Шимолий оқим» газ қувурларини портлатиш бўйича ҳалол тергов ўтказиш зарурлигини акс эттиришдан бош тортган.

Ўтган ҳафта G20 молия вазирлари ҳам Украинадаги уруш юзасидан келишмовчиликлар туфайли Ҳиндистондаги йиғилишда якуний декларация бўйича келиша олмаган эди.

Учрашув чоғида АҚШ Давлат котиби Энтони Блинкен ва Сергей Лавров ўртасида қисқа суҳбат бўлиб ўтди. Dpa агентлиги иқтибос келтирган Россия ТИВ матбуот котибининг сўзларига кўра, «Америка томони алоқа ўрнатишни сўраган».