Ҳаагадаги халқаро суд Россияга қарши 2 та иш қўзғатмоқчи

Ҳаагадаги Халқаро жиноий суд (ХЖС) Россиянинг Украинага бостириб кириши билан боғлиқ иккита ҳарбий жиноят ишини очиш ниятида ва бир неча кишини ҳибсга олиш учун ордер талаб қилади, деб хабар берди Американинг The New York Times (NYT) газетаси ва Reuters агентлиги душанба, 13 март куни манбаларга асосланиб. Суднинг ўзи бу маълумотга изоҳ беришдан расман бош тортди.

Улардан бири украиналик болалар ва ўсмирларнинг ўғирлаб кетилиши ва уларни Россиянинг «қайта тарбиялаш» лагерларига мажбуран юбориш билан боғлиқ. Иккинчиси - Украинанинг фуқаролик инфратузилмасига атайлаб зарба бериш.

Дастлаб, ХЖС прокурори Карим Хон жиноятлар тўғрисидаги тўпланган далилларни судгача бўлган гуруҳга тақдим этади, дея хабар берди NYT. У ҳибсга олишга ордер бериш учун етарли асослар бор-йўқлигини ёки прокурорлар қўшимча далиллар тўплаши зарурлигини ҳал қилиши керак. Агар айбловлар қўйилса, бу Украинадаги эҳтимолий жиноятлар учун Россия расмийларини халқаро суд олдида жавобгарликка тортишга биринчи уриниш бўлади.

Айнан кимга айблов қўйилиши номаълумлигича қолмоқда. NYT шарҳларида баъзи экспертлар ва дипломатлар Россия президенти Владимир Путин шахсан айбланувчи бўлиши мумкинлигини инкор этмади, чунки ХЖС ҳарбий жиноятлар билан боғлиқ ишлар бўйича давлат раҳбарининг дахлсизлигини тан олмайди. Шу билан бирга, NYT билан суҳбатлашган экспертлар суд жараёнини эҳтимолдан йироқ деб ҳисоблашяпти - ХЖС ишни сиртдан кўриб чиқа олмайди, Россия эса ўз мансабдорларини экстрадиция қилиши даргумон.

Россия Халқаро жиноий суднинг аъзоси эмас ва унинг юрисдикциясини тан олмайди.