NBC: Хитой ҳаво шари АҚШ базаларидан разведка маълумотини йиғган

Жо Байден маъмуриятининг бундай сценарийни бартараф этишга уринишларига қарамай, феврал ойида АҚШ узра учиб ўтган Хитой ҳаво шари Қўшма Штатларнинг бир қатор махфий ҳарбий объектларидан разведка маълумотларини тўплаган. Бу ҳақда 3 апрел, душанба куни NBC News телеканали АҚШнинг икки юқори мартабали амалдори ва бир собиқ маъмурият ходимига таяниб маълум қилди.

Уларнинг сўзларига кўра, ҳаво шари бир қанча объектлар устидан учиб ўтган (баъзи ҳолларда - саккиз рақамли траектория бўйлаб) ва тўпланган маълумотларни реал вақт режимида Пекинга узатган, деб ёзади канал.

Шу билан бирга, АҚШ Мудофаа вазирлиги Хитой аппарати реал вақт режимида ХХРга разведка маълумотларини узатишга муваффақ бўлганини ҳали тасдиқлай олмади. Пентагон вазиятни таҳлил қилишда давом этмоқда, дея Reuters агентлиги идора расмий вакили Сабрина Сингхнинг сўзларидан иқтибос келтирган.

Разведка маълумотлари асосан қурол тизимларидан ёки база ходимлари алоқаларидан олинган электрон сигналлардан иборат бўлган, лекин тасвирлар кузатилмаган.

Шу билан бирга, Америка томони бир нечта потенциал разведка нишонларини ҳаракатга келтирган ва маълум даражада ҳаво шарлари тизимларининг электр сигналларини қабул қилиш қобилиятини блоклашга муваффақ бўлган, деб ёзади NBC News.

15 феврал куни The Washington Post (WP) газетаси ўз номини ошкор қилмасликни сўраган бир неча америкалик мулозимларга таяниб, америкалик ҳарбийлар Хитой ҳаво шари учирилганидан буён унинг йўналишини кузатиб борганини хабар қилди.