Трамп Россия ва Украина ўртасида уч кунлик сулҳни эълон қилди

«Россия ва Украина ўртасидаги урушда уч кунлик ўт очишни тўхтатиш эълон қилишдан мамнунман. Россияда шу кунларда Ғалаба куни нишонланмоқда, аммо Украина ҳам Иккинчи жаҳон урушининг муҳим қисми ва иштирокчиси бўлган», деб ёзди Оқ уй раҳбари.

Унинг сўзларига кўра, бу ўт очишни тўхтатиш барча жанговар ҳаракатларни тўхтатишни, шунингдек, ҳар бир томондан 1000 кишидан иборат асирларни алмашишни ўз ичига олади.

«Президент Владимир Путин ва Президент Владимир Зеленскийнинг розилигини юксак қадрлайман. Умид қиламанки, бу жуда узоқ, қонли ва оғир урушнинг тугашининг бошланиши бўлади. Иккинчи жаҳон урушидан бери энг йирик бўлган бу можарони тугатиш бўйича музокаралар давом этмоқда ва биз кун сайин мақсадга яқинлашмоқдамиз», деб тушунтирди у.

4 май куни Россия Мудофаа вазирлиги Ғалаба кунини нишонлаш шарафига 8-9 май кунлари Украина билан урушда сулҳ эълон қилди. Вазирлик Киевни Москвадан ўрнак олиб, сулҳ эълон қилишга чақирди. Агар Ғалабанинг 81 йиллигини нишонлашга тўсқинлик қилишга уриниш бўлса, Россия «Киев марказига оммавий ракета ҳужуми»ни амалга ошириш билан таҳдид қилди.

Украина президенти Володимир Зеленский шундан сўнг 6 майдан бошлаб «сукунат режими» жорий этилишини эълон қилди.