Германия Россия атом энергетикасига қарши санкциялар жорий этишга чақирди

Россиянинг Украинага қуролли бостириб кириши фонида Германия ҳукумати Россия атом саноатига қарши Европа Иттифоқи санкцияларини қўллашни ёқлаб чиқди. «Биз Россиянинг босим ўтказиш учун энергетик қарамликдан атайлаб фойдаланаётганини кўрдик. Шу боис федерал ҳукумат Европа комиссиясини фуқаролик ядро секторига ҳам санкциялар жорий этишга чақирди. Бу навбатдаги санкциялар пакетининг бир қисми бўлиши керак», - деди Германия вице-канцлери Роберт Ҳабек 15 апрель, шанба куни эълон қилинган dpa билан суҳбатда.

Россия, бошқа нарсалар қаторида, атом электр станциясининг ёқилғиси учун уран етказиб беради ва радиоактив чиқиндиларни ўз ҳудудида сақлайди. Ҳабек фикрича, Европа Иттифоқи Россиядан мустақиллигини мустаҳкамлаши керак. «Биз кўплаб соҳаларда, жумладан, энергетика соҳасида аллақачон катта ютуқларга эришдик. Фақат ядро сектори қолди», - деди Германия вице-канцлери. 

Ҳабекнинг сўзларига кўра, Россия атом саноатидаги имтиёзли муносабатни ҳеч нарса билан оқлаб бўлмайди. «Ядро технологияси ўта нозик соҳа ва Россияни бу ерда энди ишончли ҳамкор сифатида қабул қилиб бўлмайди», деди у.