АҚШ ва Франция Хитой бўйича сиёсатда ҳамкорликни давом эттиради

Макроннинг Пекинга ташрифидан кўп ўтмай бўлиб ўтган видеомулоқотда АҚШ ва Франция президентлари Ҳиндистон-Тинч океани минтақасида умумий қадриятларни илгари суришда давом этиш ниятида эканликларини эълон қилишди.

Фото: Reuters

АҚШ ва Франция Хитойга нисбатан сиёсатда ҳамкорликни давом эттириш ниятида. Буни 20 апрель, пайшанба куни кечки видеомулоқотда Америка президенти Жо Байден ва унинг Франциялик ҳамкасби Эммануэл Макрон тасдиқлади. Оқ уй матбуот хизматига кўра, улар Макроннинг Хитойга яқинда қилган ташрифи, шунингдек, ўз мамлакатларининг Ҳинд-Тинч океани минтақасида умумий қадриятлар ва «қоидаларга асосланган халқаро тартиб»ни илгари суриш бўйича саъй-ҳаракатларини муҳокама қилишган. Бундан ташқари, Эммануэл Макрон ва Жо Байден Тайван бўғозида тинчлик ва барқарорликни сақлаш зарурлигини таъкидлади.

Макрон Хитойдан қайтгач, катта резонансга сабаб бўлган бир қанча баёнотлар билан чиқди. Хусусан, Пекин ва Вашингтон ўртасида Тайван муаммоси бўйича кескинлик кучайиб бораётган бир пайтда у европаликлар «бизники бўлмаган (Европанинг)» инқирозлардан қочиши, АҚШ «вассали»га айланмаслиги керак, деган фикрни билдирди.

Франция президентининг бу сўзлари кўплаб Хитой оммавий ахборот воситалари томонидан маъқулланган, аммо Ғарбда кескин танқидларга сабаб бўлганди.

Икки президент ўртасидаги суҳбатнинг яна бир муҳим мавзуси Украинадаги уруш бўлди. Оқ уй ва Елисей саройи матбуот хизматлари хабар беришича, Байден ҳам, Макрон ҳам Киевни Россия тажовузи қаршисида қўллаб-қувватлашни давом эттириш қатъиятини тасдиқлади.