Медведев: Россия биринчи бўлиб ядро қуролидан фойдаланиши мумкин 

Россия Хавфсизлик кенгаши раиси ўринбосари Дмитрий Медведев яна бир бор ядро қуролидан фойдаланиш билан таҳдид қилди ва «агар давлат мавжудлигига таҳдид соладиган тажовузкорлик кўрсатилса», Россия биринчи бўлиб буни амалга ошириши мумкинлигини айтди. «Сиз Россия ҳеч қачон биринчи бўлиб ядро қуролини қўлламаслигини айтдингиз, аммо бу тўғри эмас», деди у 25 апрель, сешанба куни бўлиб ўтган «Знание.Первые» марафонида сўзлаган нутқида.

Медведев Россия ядровий доктринасининг бандларидан бирига ишора қилди. «Унда очиқ айтилган, агар Россия Федерациясига қарши давлатнинг мавжудлигига таҳдид солувчи бошқа турдаги қуроллардан фойдаланган ҳолда тажовуз амалга оширилса, ядро қуролидан фойдаланиш мумкин. Бу, аслида, ядро қуролидан фойдаланишдир. Бизнинг потенциал оппонентларимиз буни эътибордан четда қолдирмасликлари керак», - деди Россия Хавфсизлик кенгаши раисининг ўринбосари.

Медведевнинг фикрича, бугунги дунёда Россия учун ядро қуроли «давлат таянчи каби ўзига хос аҳамиятга эга». Унинг фикрича, худди шу сабабдан бошқа давлатлар ҳам ядро қуролига эга бўлишга интилмоқда.

Дмитрий Медведев Россия Федерациясининг Украинага қарши уруши пайтида «Россиянинг мавжудлигига хавф-хатар туғилган тақдирда» ядровий қуролдан фойдаланиш билан бир неча бор таҳдид қилган. Бу баёнотлар Украинани қўллаб-қувватловчи Ғарбда кескин салбий муносабатга сабаб бўлди. Шу билан бирга, НАТО ва Европа Иттифоқи давлатлари бир овоздан Россиянинг қўшни давлатга қарши адолатсиз тажовузкор урушда ғалаба қозонишига йўл қўймасликларини бир неча бор таъкидлаган.