«Реал» дарвозасига покер. Аргентиналик ноунейм бир кечада юлдузга айланди

Октябр ойида ҳам Каталония пойтахтида «Жирона»нинг «Сантьяго Бернабеу»да эришган дуранги (1:1) тантана қилинганди. Ўшанда бу натижа Каталониянинг асосий жамоасининг бўлажак чемпионлиги учун қўшган ҳиссаси сифатида қабул қилинганди. Ярим йил ўтиб яна шу «Жирона» «Реал»ни камситган ҳолда барча каталонияликларни хушнуд этди, оқ-қизиллар жамоаси ҳужумчиси Валентин Кастельянос ҳақида эса сешанба оқшомида бутун Европа гапира бошлади.

Жаҳоннинг энг яхши жамоаси дарвозасига тўрт гол — улкан ҳодисадир. Бу Роберт Левандовскининг роппа-роса ўн йил муқаддам, 2013 йил 24 апрелида Чемпионлар лигаси яримфиналида мадридликлар дарвозасига йўллаган покеридан қолишмайдиган ҳодиса.

2006 йил февралида ҳам Диего Милито шундай порлоқ кечани ўтказганди. Ўшанда «Сарагоса» Испания Кубоги яримфиналида «Реал» мудофаасини чилпарчин қилганди (6:1). Бу сафарги ўйин икки жамоа учун ҳам турнир нуқтайи назаридан у қадар аҳамиятли эмасди. Аммо бундай ўйинлар тарихда юзлаб бўлган, «Реал»га эса ҳар ўйинда ҳам тўрт гол урилавермайди.

Гап шу куни дарвозада соғлигидаги муаммо юзага келган Тибо Куртуа турмаганида ҳам эмас. Дарвоза бўш эмасди, украиналик Лунин эса бу мавсумда биринчи бор асосий таркибда тушмаётганди ва у ўтказган ўйинлар орасида кузги класико ҳам. Ўшанда у «Барса»га қарши ўйинда биргина гол ўтказган, жамоа ишончли ғалабага эришганди (3:1), бу ўйинда эса ўртамиёна даражадаги рақиб тўрт гол уришга эришди. Ла лигада мадридликлар 76 йилдан буён бундай ҳолатга тушмаганди.

Умрга татигулик ўйин

Мавсум якунига саккиз тур қолганида Ла Лигада чемпионлик интригаси узил-кесил барҳам топди. «Барселона» «Реал»дан 11 очкога ўзиб кетганди, аммо бу ўйиндан кейин фарқ 14 очкога етди. «Реал» жиддий қаршилик кўрсатиши кутилмаган «Жирона»дан 4 гол ўтказди – барча голлар шу вақтгача деярли ҳеч ким танимаган аргентиналик форвард томонидан урилди.

Биринчи бўлимда «Жирона» «Реал»га нисбатан яхшироқ ўйнади дейиш қийин, аммо вазиятлардан унумли фойдаланиб, икки гол урди. 12-дақиқадаёқ майдон эгалари муваффақиятли ҳужум уюштирди, унинг якунида Валентин Кастельянос Мигел Гутьерреснинг узатмасидан кейин боши билан дарвозани ишғол этди – 1:0. «Реал»да биринчи дақиқадаёқ яхши вазият юзага келганди, аммо Родриго яқин масофадан туриб тўпни дарвоза тўрига кирита олмади.

24-дақиқага келиб Кастельянос дублни нишонлади: форвард Эдер Милитаодан қочиб кетди ва тўпни Андрей Луниннинг оёқлари орасидан ўтказди.

Биринчи бўлимда «Реал» тўпга эгалик қилиш бўйича (ўйиннинг 77 фоиз вақтида) ҳам, дарвоза томон зарбалар бериш бўйича (11 зарба) ҳам устунлик қилди ва битта жавоб голи ҳам урди. Винисиус Жуниор Марко Асенсионинг узатмасини боши билан дарвозага йўллади – 1:2.

Аммо иккинчи бўлимда «Реал»дан кутилган камбэк содир бўлмади. Меҳмонлар Кастельяносни тўхтата олишмади ва танаффусдан қайтибоқ ҳет-трикни расмийлаштирди. Ян Коутунинг узатмасини аргентиналик ҳужумчи Луниннинг ёнгинасидан ўтказди – 3:1.

62-дақиқада эса Валентин тарихга кирди – у XXI асрда Ла Лига ўйинида «Реал» дарвозасига покер қайд этган биринчи футболчига айланди. «Жирона» бурчакдан тўпни ўйинга киритди ва узатма ҳужумчининг бошини топди – 4:1.

Бундай муваффақиятдан кейин Кастельяноснинг трансфер қиймати ошиши аниқ. Трансфер ҳуқуқи «Нью-Йорк Сити»га тегишли бўлган ушбу ҳужумчи «Реал» билан ўйинга қадар Ла Лиганинг 28 ўйинида 7 гол уриб, битта голли пас муаллифи бўлганди.

«Реал» биринчи бўлимда бўлгани каби битта жавоб голи уришга эришди. Ўйин охирларида Винисиус жарима майдонига ёриб кириб, тўпни ўзида сақлаб қолди ва қулай вазиятда турган Лукас Васкесни тўп билан таъминлади – 2:4. 

«Реал» иккинчи ўринда қолди, аммо энди, афтидан, Карло Анчелотти жамоаси иккинчи ўринни сақлаб қолиши учун «Атлетико»га қарши кураш олиб боради, учинчи ўриндаги «матрасчилар» беш очкога ортда қолган, аммо бир захира ўйинига эга.

Вилья билан бир жамоада

«Орзудаги оқшом! Биз дунёнинг энг кучли клубларидан бирига қарши ўйинадик ва мен бундай бўлишини тасаввур ҳам қила олмасдим. Мен футболчиларимиз, оилам, Аргентинада — Мендосда туриб мени қўллаб-қувватлаётган барча билан бирга хурсандчилик қиляпман. Ҳа, мен МЛСда ҳам тўрт гол урганман, аммо булар турлича кунлар экани аниқ. «Реал»га гол уриш орзу эди, тўрт гол уриш эса ақл бовар қилмайдиган нарса», — дея ўйиндан кейинги ҳиссиётларини бўлишди Кастельянос.

Атрофидагилар Тати деб чақирадиган Кастеляноснинг бошқаларникига ўхшамаган ҳикояси бор. Масалан, у ҳеч қачон ватани Аргентинада ўйнамаган ва ҳатто у ўқиган футбол академияси ҳам Чилида эди. Лекин уни «Универсидад де Чили»нинг асосий жамоасига олишмайди ва форвард Уругвайнинг «Торке» клубига ижарага берилади.

Монтевидеонинг бу клуби сўнгги йилларда миллий биринчиликда юқори ўринларни эгаллаб келмоқда ва Либертадорес Кубогида иштирок этмоқда,  Кастельянос эса бу жамоага иккинчи дивизиондан чиқишга ёрдам берганди. Ўшанда ўсмир футболчининг статистикаси камтаргина эди, аммо унинг умумий муваффақиятдаги ҳиссаси қадрланади ва унинг трансфер ҳуқуқи сотиб олинади.

Кейин эса у «Нью-Йорк Сити»га йўл олади. 2018 йилда Тати бу клубга машҳур испаниялик ҳужумчи Давид Вильяга ўринбосар сифатида келганди, жамоани эса 59 гол билан клуб тарихидаги энг яхши иккинчи тўпурар сифатида тарк этади. Қолаверса, МЛС «Олтин бутса»сини қўлга киритади ва «Сити» билан чемпионликка эришади.

Аргентиналик ҳужумчига «Бешиктош», «Вест Ҳэм» ва «Краснодар» клублари қизиқиш билдиради, аммо бу жамоаларнинг ҳеч бири 20 ёшида Европада ҳали ўзини кўрсатмаган ҳужумчи учун 10-15 миллион доллар сарфлашни истамайди, у миллий жамоада фақат Олимпиада-2020 саралашида қатнашган, аммо Хулиан Алвареснинг соясида қолиб кетган. Жанубий Америкадаги «Палмейрас» ва «Ривер Плейт» каби  маҳаллий грандлар эса унинг учун тўрт миллион доллардан ортиқ маблағ таклиф этмайди.

Гвардиоланинг марҳамати

Аммо Тати Америка лигалари даражасидан ўзиб кетгани яққол кўриниб турганди. Унинг ўзи ҳам тан олади: Европага кўчиб ўтиш — унинг азалий орзуси эди, кўҳна қитъа клубларидан бўлаётган қизиқишлар — унга мотивация беради. «Сити» кийим алмаштириш хонасида у билан бирга суратга тушган Хосеп Гвардиоланинг сўзлари каби. Пеп ўшанда собиқ ассистенти Доменек Торрент бошқараётган жамоа ўйинига ташриф буюрган ва ўйиндан кейин футболчилар билан қисқача суҳбат ўтказганди.

Бироз ўтиб Гвардиола Кастелянос Европага келишга тайёр экани ҳақида айтади, футболчининг ўзи эса Transfermarkt учун интервюда шундай дейди: «Дунёнинг энг яхши мураббийларидан бири мен ҳақимда гапириши жуда ёқимли. Бу ўз ўйинимни янада яхшилаш ва чин дилда ишлаш учун иштиёқ беради».

Якунда ўз ичига «Манчестер Сити» ва «Нью-Йорк Сити» клубларини олувчи Сity Football Group тизими Кастеляносга ёрдамга келади. Бу компания «Жирона» акцияларининг 47 фоизига эгалик қилади, аргентиналик форвард ҳам мавсум аввалида шу клубга ижарага берлади. Аввалига — футболчи ўзини Европа футболида синаб кўриши, муваффақиятли чиққан тақдирда ўз трансфер нархини «Нью-Йорк» талаблари даражасида кўтариши учун.

Бу режа ёмон чиққани йўқ. «Реал» билан тарихий ўйинга қадар Тати асосан «Хетафе» ва «Элче» каби ўртамиёна клубларга қарши гол уриб юрди (ҳар икки даврада ҳам). Шу вақтгача ундан жабрланган энг юқори статусли жамоа эса «Реал Сосьедад» бўлганди. Форвард каталонияликлар жамоасида уругвайлик тажрибали Стуани билан рақобат қилишига тўғри келмоқда.

Бир ярим ҳафта олдин унинг учун барчаси жуда ёмон кечганди. «Камп Ноу»даги ўйинда Кастелянос дарвозабон билан яккама-якка вазиятга чиқиб борган, аммо янада қулайроқ вазиятда турган шеригига тўп узатмаган, ўзи ҳам хато зарба берганди. Жамоадошлари бўлажак чемпион билан дурангни (0:0) нишонлаётганида, Тати бир бурчакда ўтириб кўз ёшларини тия олмаётган, уни дарвозабон Гассанига юпатишига тўғри келганди. Ижтимоий тармоқларда уни танқидларга кўмиб ташлашганди, натижада у аккаунтларига қулф осиб қўйди. 

«Жирона» фанатлари кейинги ўйиндаёқ форвардни қўллаб-қувватлашди – ва у «Элче» дарвозасига гол уриш орқали жавоб қайтарди.

«Реал»га қарши ўйинда эса у ўз ҳейтерларининг оғзини юмиб қўйди.