Тошкентда энагага ташлаб кетилган 3 ёшли қиз унинг хонадонида вафот этди

Ижтимоий тармоқларда 3 ёшар қизнинг ўлими ҳолати юзасидан видеомурожаат тарқалиб, турли муҳокамаларга сабаб бўлмоқда. Тошкент шаҳар ИИББ мазкур ҳолат юзасидан маълумот берди.

Фото: Getty Images

Қайд этилишича, жорий йилнинг 25 апрель куни 1996 йилда туғилган Д.У. Сергели тумани ИИО ФМБга ариза билан мурожаат қилиб, синфдоши, 1996 йилда туғилган Ш.Н.га вояга етмаган фарзанди, 2020 йилда туғилган С.У.ни энагалик қилиши учун топширганини, лекин фарзанди унинг хонадонида вафот этганини маълум қилган.

Текширув жараёнида Ш.Н. вояга етмаган С.У. 24 апрель куни ертўлага тушиш зинасидан йиқилганини, лекин ўрнидан туриб яна ўйнаб кетгани сабабли унинг онасига бу ҳақида хабар бермаганини, шифокорларга ҳам С.У.га тиббий ёрдам кўрсатиши учун мурожаат қилмаганини, 25 апрель куни тахминан соат 10:00 ларда С.У. ҳушидан кетиб йиқилганини ва тез тиббий ёрдам ходимлари келгунига қадар вафот этганини маълум қилган.

3 ёшли қизнинг ўлим сабабини аниқлаш мақсадида судга оид тиббиёт экспертизаси тайинланган.

Мазкур ҳолат юзасидан Сергели тумани ИИО ФМБ томонидан Жиноят кодексининг 117-моддаси (“Хавф остида қолдириш”) билан жиноят иши қўзғатилган. Гумон қилинувчи Ш.Н. процессуал тартибда ушланган. Тергов давом этмоқда.

#Сергели #энага