Россия президенти Владимир Путин 1994 йилда имзоланган Будапешт меморандумини тан олмаслигини айтган. Бу ҳужжат Россия, АҚШ ва Буюк Британия томонидан Украинанинг ҳудудий яхлитлигини тан олиш ҳақида эди.
АҚШ собиқ президенти Билл Клинтон Россиянинг Украинага ҳужуми фақат «вақт масаласи» бўлганини айтди. Унинг сўзларига кўра, буни 2011 йилда, Давос шаҳрида Владимир Путин билан гаплашган пайтида тушуниб етган. Бу ҳақда Клинтон Нью-Йоркдаги 92NY маданият марказидаги чиқишида гапирди, деб ёзди Financial Times.
«Владимир Путин 2011 йилда, Қримни эгаллашидан уч йил олдин, мен билан Борис Ельцин тузган келишувга рози эмаслигини айтди. У шундай деди: «Мен бунга қўшилмайман, мен буни қўллаб-қувватламайман ва ўзимни бу келишув билан боғланган деб ҳисобламайман». Ўша кундан бошлаб мен буни [Россиянинг Украинага бостириб кириши] вақт масаласи эканлигини англадим», деди Клинтон.
Гап Будапешт меморандуми ҳақида кетмоқда, унга кўра Россия, АҚШ ва Буюк Британия Украинанинг ҳудудий яхлитлигини тан олади. Москва Лондон ва Вашингтон билан биргаликда Украина ядровий арсеналини йўқ қилиш эвазига Киев хавфсизлигини кафолатлайди. Ҳужжат 1994 йилда Борис Ельцин, Билл Клинтон, Украина президенти Леонид Кучма ва Буюк Британия бош вазири Жон Мейжор томонидан имзоланган.
Нью-Йоркдаги тадбирда иштирок этган Клинтоннинг рафиқаси, АҚШ собиқ давлат котиби Ҳиллари Клинтоннинг айтишича, ҳарбий ҳаракатларни тўхтатиш учун Украина ё Россияни мағлуб этиши, ёки ҳеч бўлмаганда мамлакат шарқида бой берилган ҳудудларни қайтариши керак.
«Агар биз қўллаб-қувватлаётган украиналикларда етарли таъсир кучи бўлмаса, мен музокаралар столида ҳеч қачон унга [Путинга] ишонмаган бўлардим», деди Клинтон.
Клинтонлар Ғарбни Украинани қўллаб-қувватлашни кучайтиришга чақирди ва агар у етарлича қурол ва ўқ-дорилар билан таъминланса, Киев ғалаба қозониши мумкинлигини айтди. Уларнинг фикрича, Украинани қўллаб-қувватлашдан бош тортиш нафақат Путинга, балки Хитой етакчиси Си Жинпинга ҳам жасорат бахш этади.
Бу Билл Клинтоннинг Будапешт меморандуми ҳақида биринчи марта гапириши эмас. Аввалроқ у 1994 йилда Украина ҳукуматини совет ядровий арсеналидан воз кечишга кўндирганидан афсусда эканини айтган эди.
