Остонада қуролланган шахс банкда одамларни гаровга олди. У қўлга олинган

Қозоғистон пойтахти Остона шаҳрида банк бўлимида одамлар гаровга олинди. Қозоғистон ИИВ маълумотига кўра, қуролланган шахс Kaspi банкининг Дўстлик кўчасидаги филиалига ҳужум қилган.

Банк матбуот хизмати ичкарида фақат банк ходимлари бўлганини хабар қилган.

Полиция босқинчи билан музокаралар ўтказган. Маҳаллий нашрлар хабарига кўра, банк бўлими жойлашган бинода яшовчилардан квартираларини тарк этиш сўралган. Бино чор атрофдан ўраб олинган.

Банкда етти нафар аёл ва бир қўриқчи бўлгани хабар қилинган. Уларни гаровга олган шахс эса, банкнинг барча активларини ногирон болалар, камбағал ва муҳтожлар фондига ўтказишни талаб қилган. У ўз талабларини бажариш учун уч соат вақт берган, шундан сўнг гаровга олинганларни ўлдира бошлашини айтган.

Кўп ўтмай ушбу шахс қўлга олиниб, гаровдагиларнинг барчаси озод этилди. Ижтимоий тармоқларда жиноятчининг қўлга олиниши акс этган видео тарқалган. ОАВ маълумотига кўра, бу 30 ёшли Алихан Мурадов бўлиб, унинг «кредит билан боғлиқ муаммолари» бўлган.