Саида Мирзиёева Қозоғистон президенти администрацияси раҳбари билан учрашди

Саида Мирзиёева Қозоғистон Республикаси президенти администрацияси раҳбари Роман Скляр билан учрашиб, Ўзбекистон ва Қозоғистон ўртасидаги шериклик муносабатларининг бугунги ҳолати ҳамда уларни янада ривожлантириш истиқболларини муҳокама қилди.

Фото: Саида Мирзиёева / Telegram

Учрашув чоғида томонлар икки мамлакат раҳбарлари даражасида эришилган келишувларнинг изчил ва тўлиқ амалга оширилиши масалалари юзасидан фикр алмашди.

Суҳбат давомида президент администрациялари ўртасида янада яқин, тезкор ва самарали ҳамкорлик механизмларини йўлга қўйиш муҳимлиги таъкидланди. Шу мақсадда икки давлат администрациялари ўртасидаги ўзаро алоқаларни мустаҳкамлаш ва мувофиқлаштирувчи ҳамкорликни кенгайтиришга келишиб олинди.

Томонлар Ўзбекистон–Қозоғистон стратегик шериклиги ва иттифоқчилик муносабатларини янада ривожлантиришга хизмат қилувчи қўшма ташаббусларни қўллаб-қувватлашга тайёр эканликларини билдирди.