Маскнинг онаси унга Цукерберг билан жанг қилишни тақиқлади

Илон Маскнинг онаси Мэй Маск ўғлининг Meta компанияси раҳбари Марк Цукерберг билан MMA қоидалари бўйича ўтказилиши режалаштирилаётган жангини бекор қилганини айтди. Бу ҳақда у Twitter ижтимоий тармоғида ёзди.

«Аслида мен жангни бекор қилдим. Аммо ҳали уларга айтмадим. Ҳар эҳтимолга қарши жанг бекор қилинганини айтишда давом этаман...», деди Мэй Маск.

Аввалроқ миллиардернинг онаси «сўз билан» жанг қилишни таклиф этганди.

«Фақат сўзлар ёрдамида курашинг. Креслода ўтириб. Бир-бирингиздан бир метр масофада. Ким энг кулгили бўлса, ўша ғалаба қозонади», деб ёзди у.

Илон Маск онасининг сўзларига ҳазиломуз тарзда муносабат билдирди. «Онажон, бас қилинг, барибир у билан жанг қиламан», деб ёзди у.

Twitter ижтимоий тармоғининг эгаси Илон Маск 21 июнь куни Facebook асосчиси Марк Цукербергни яккама-якка курашга чақирди. Бунга Facebook томонидан Twitter рақобатчиси ишлаб чиқилаётгани ҳақидаги хабар сабаб бўлди. Цукерберг уунга жавобан: «Жанг қаерда бўлишини ёзиб юбор» деди. Маск Лас-Вегасдаги машҳур UFC жанглари ўтказиладиган зални танлади.

Кейинроқ, Универсал жанглар чемпионати (UFC) президенти Дана Уайт Маск ва Цукерберг билан гаплашиб олганини, иккаласининг нияти «жиддий» эканини айтди.