Туркияда Интерпол қидирувидаги уюшган жиноий гуруҳ ушланди

Туркиянинг 7 вилоятидаги 13 та манзилда ўтказилган махсус операцияда 10 млрд долларлик наркотик моддалар савдосини амалга оширган ташкилотга алоқадор 34 киши ҳам ушланган. Турк матбуотининг ёзишича, гумонланувчиларнинг 36 та кўчмас мулки ва 1,1 млрд лиралик мол-мулки мусодара қилинган.

Наркотик савдогарларга тегишли ташкилот Жанубий Америкадан Европага тонналаб кокаин жўнатган. Истанбул полицияси ва Молиявий жиноятларни тергов қилиш агентлигининг бир неча ойлик кузатишларидан сўнг икки босқичда (13 июнда Голландия ва Белгияда, 25 июнда Туркияда) ўтказилган кенг кўламли махсус операцияда ташкилот аъзолари ва уларга тегишли мол-мулк фош қилинган.

Операция давомида жиноятчилардан 11 та тўппонча, 600 та патрон, кўплаб қалбаки паспорт ва бошқа ҳужжатлар топилган. Бундан ташқари, 50 млн лиралик иккита соат, 99,9 кг олтин, иккита моторли транспорт воситаси, доллар, евро ва турк лираси кўринишида, умумий қиймати 1,1 млрд лирага тенг нақд пул, акциялар ва банк-ҳисоблари мусодара қилинган.

CNN TURK хабарига кўра, Жанубий Америка ва Европада гиёҳванд моддалар савдосини бошқараётган муҳим шахслардан бири бўлган ва Интерпол томонидан қизил билдиришнома билан қидирилаётган голландиялик Йозеф Йоҳаннес Лиждеккерснинг Туркия билан алоқалари 2 йил аввал аниқланган. Истанбул полицияси томонидан олиб борилган тергов-суриштирув ишлари чуқурлашиб кетгач, бу ишга Молиявий жиноятларни тергов қилиш агентлиги ва Наркотикларга қарши курашиш департаменти ҳам жалб этилган.

Полиция жиноий тармоқнинг асосий шахсларидан бири ҳисобланган Исаак Бигнаннинг Туркияда эканини аниқлайди. Маълум бўлишича, у 13 июнда Голландия ва Белгияда ўтказилган илк операциядан сўнг Туркияга қочган, шу сабабли Финикс ва жамоаси уни Туркиядан яширинча олиб чиқишни режалаштирганди.

Бироқ уларнинг режаси амалга ошмади. Исаак Бигнан Испартада, Юреан Энтони Финикс эса Истанбулда қўлга олинган.