Қўқонда Туркий тилли ёшларнинг халқаро фестивали бўлиб ўтади

Ушбу халқаро тадбир ёш авлоднинг халқлар тарихи ва миллий-маданий меросига меҳрини ошириш, Туркий давлатлар ташкилотига аъзо мамлакатлар билан туризм соҳасидаги ҳамкорлик алоқаларини янада кенгайтириш, умумтуркий маданий меросни биргаликда дунё бўйлаб тарғиб қилиш, ёшларнинг ижтимоий-иқтисодий фаоллигини ошириш, уларни туризм соҳасига кенг жалб этиш, ёшларнинг туризм соҳасидаги истиқболли ғоялари ва лойиҳаларини амалга ошириш мақсадида ташкил этилмоқда.

Халқаро анжуманда Қирғизистон, Қозоғистон, Туркманистон, Туркия ва Озарбойжондан кўплаб ёшлар иштирок этади. 

Фестиваль доирасида китобхонлик кунини юқори савияда ташкил этиш, дастур асосида юқори натижаларга эришган ҳамда ёшларга ўрнак кўрсатадиган илм-фан намояндалари, ишбилармонлар, спорт усталари ва ҳунармандлар иштирокида маҳорат дарслари, миллий ва этноспорт турлари бўйича спорт мусобақалари, кўргазма, таниқли театр ва кино ижодкорлари билан ижодий мулоқотлар ва бошқа маданий-кунгилочар тадбирлар ўтказилиши кўзда тутилган.