ЕИ қочқинлар учун янги қоидаларга оид декларация бўйича келиша олмади

Венгрия ва Полша қочқинларни Европа Иттифоқи давлатлари ўртасида тақсимлашнинг янги механизмини танқид қилмоқда. Европа Иттифоқи давлатлари Ички ишлар вазирликлари раҳбарлари аввалроқ бошпана бериш тартибини ислоҳ қилиш бўйича муросага эришган эди.

Фото: Reuters

Европа Иттифоқига аъзо давлатлар Брюссел саммити чоғида янгиланган бошпана сиёсати бўйича қўшма декларация чиқара олмади. 30 июнь, жума куни Венгрия ва Полша ҳужжатни амалдаги таҳрирда қўллаб-қувватлашдан бош тортди. Хусусан, Варшава ва Будапешт Европа Иттифоқига аъзо давлатлар ўртасида бошпана изловчиларнинг оз сонини тақсимлашни назарда тутувчи режалаштирилган бирдамлик механизмини рад этди.

Полша тушунтириш талаб қилиб, «қочқинларни қайта тақсимлаш тартиби ихтиёрий бўлиб қолиши кераклиги кўрсатилиши лозим»лигини билдирди, деб тушунтирди бош вазир Матеуш Моравецкий. Бироқ Европа Иттифоқининг бошқа давлатлари бундай таклифни рад этди.

Бельгия бош вазири Александр Де Кроо блокланган қўшма декларациядан афсусда эканини билдирган. Шу билан бирга, Германия канцлери Олаф Шолц барча манфаатдор томонлар қонунга риоя қилишига ишоняпти. Берлин вазиятдан ортиқча хавотирда эмас, чунки келишувларни амалга оширишнинг турли йўллари бор, дея тушунтирди Германия ҳукумати раҳбари Брюсселдаги саммитдан кейин.

Июнь ойи бошида Европа Иттифоқи ички ишлар вазирлари бошпана ва вақтинчалик ҳимоя тартибларини ислоҳ қилиш бўйича муросага келди. Ўзгаришлар муҳожирлар оқимига дуч келган мамлакатлар учун бирдамлик механизмини тақдим этади.

Ушбу механизмга кўра, ҳар йили камида 30 000 бошпана изловчи Европа Иттифоқи давлатлари ўртасида жойлаштирилиши мумкин. Қочқинларни қабул қилишни истамаган давлатлар ҳар бир рад этилган бошпана изловчи учун тахминан 20 000 евро миқдорида товон тўлаш ҳуқуқига эга.