Путин Қрим кўпригига қилинган ҳужумни террорчилик ҳаракати деб атади 

Россия президенти Владимир Путин Қрим кўпригидаги портлашни теракт деб атади. 

«Бугун тунда кўприкда яна бир террорчилик ҳаракати содир этилди. Тинч аҳоли ҳалок бўлди. Бир бола яраланиб, ота-онасиз қолди: оила Белгород вилоятидан Қримга кетаётган эди», деди у. 

Президент бу кўприкдаги иккинчи теракт эканини эслатиб, хавфсизлик чораларини яхшилаш бўйича таклифларни кутаётганини айтди. 

«ФХХ, Тергов қўмитаси, бошқа бир қатор бошқармаларга воқеани батафсил ўрганиш бўйича топшириқ берилди. Мен барча ҳолатлар аниқланишига шубҳа қилмайман. Бу стратегик аҳамиятга эга транспорт иншоотида хавфсизлик чораларини яхшилаш бўйича таклифлар кутяпман», деди у. 

Путин мутасаддиларга кўприкга етказилган зарарни аниқлаб, тезкорлик билан таъмирлаш ишларини бошлаш бўйича топшириқ берди. 

17 июлга ўтар кечаси иккита дрон Қрим кўпригига зарба бериб, унинг автомобил йўли қисмига зарар етказган эди. Оқибатда, эр-хотин ҳалок бўлди, қизи яраланди. Кўприкда транспорт ҳаракати тўхтатилди.