«Акамни қутқара олмадим». Караокедаги ҳалокатли ёнғин тафсилотлари

29 июл куни Фарғона шаҳридаги 4 қаватли бино ертўласида жойлашган караоке кафесида ёнғин содир бўлди. Ҳалокатли ёнғин оқибатида 6 киши ҳалок бўлган. 7 киши турли даражадаги тан жароҳати билан шифохонага ётқизилди. Kun.uz мухбири воқеа жойида бўлиб тафсилотларни ўрганди. Ёнғиндан омон қолиб айни пайтда шифохонада даволанаётганлар билан суҳбатлашди.

Фарғона вилоят ФВБ ахборот хизмати раҳбари Аҳлиддин Алижоновнинг маълум қилишича, караоке ичкарисида фойдаланилган вентилятор ёнғин келтириб чиқаргани тахмин қилинмоқда.

“Келиб тушган хабарга асосан вилоят ФВБ махсус гуруҳ ҳам ёнғин қутқарув экипажлари зудлик билан воқеа жойига етиб келган. Бинонинг ертўласи тутун билан қопланганлиги сабабли махсус ускуналар ёрдамида 13 нафар фуқаро ташқарига олиб чиқилди.

Улардан 6 нафари ҳалок бўлган. 7 нафари шифохонага ётқизилган. Караоке ичкарисидаги фойдаланилган вентилятор ёнғин келтириб чиқаргани тахмин қилинмоқда. Ҳалок бўлганларнинг барчаси тутундан заҳарланган. Содир бўлган ҳолат бўйича терговга қадар суриштирув ҳаракатлари олиб бориляпти”, – дейди у.

Шифохонада бўлиб ҳодисадан жабрланган фуқаролар билан суҳбатлашдик.

“Холамнинг ўғли хонадан чиқа олмай ҳалок бўлди”

“Караокега соат 11:00ларда тўрт киши бўлиб кирган эдик. Орадан ярим соатлар ўтиб хонамизга тутун кира бошлади. Йўлаккача базўр чиқиб олдим. Қолганлар хонада қолиб кетди. Биз ўтирган хонадан ташқари 3-4 та хонада одам бор экан. Биз 5-хонада эдик. Биз ўтирган хонада холамнинг ўғли ҳам бор эди. У тутун орасидан чиқа олмай ҳалок бўлди. Унга ёрдам бера олмадим.

Лекин ёнимдаги икки шерикни олиб чиқишга улгурдим. Хонада чақнаш ёки бошқа бирор ҳодиса кўрмадик. Кўзимга фақат тутун кўринди холос”, – дейди исми сир қолишини истаган жабрланувчилардан бири.

Суриштирув давомида караоке ичкарисида Фарғона шаҳридаги ўқув марказларидан бирида кириш имтиҳонларига тайёрланаётган абитуриентлар ҳам бўлгани маълум бўлди.

“Караокега 8 киши кирган эдик. Биримиз ичкарида қолиб кетди”

“Фарғона давлат университетига кириш учун ҳужжат топширган эдим. Фарғона шаҳридаги ўқув марказларидан бирида кириш имтиҳонларига тайёргарлик кўраётгандик. Бугун ўқув марказидаги охирги имтиҳонни топшириб хурсандчилигимизни караокеда нишонлашга қарор қилгандик. Соат 11:00 ларга яқин караокега кирдик. Қўшиқ айтиб ўтирганимизда бирдан свет ўчиб қолди. Хонадошим эшикни очиши билан атрофни тутун қоплаб олди. Ташқарига чиқишга ҳаракат қилдик. Лекин йўлни топа олмадик.

Хонада жами бўлиб 8 киши эдик. Орамиздан 5 киши ташқарига амаллаб чиқиб кетди. 3 қиз қолиб кетиб ёрдам сўраб бақирдик. Қора тутун ичида ҳеч ким бизни кўрмади. Йўлакда ерга узала тушиб ётган қизга кўзим тушди. Уни ташқарига олиб чиқиб кета олмадим. У ўша ерда қолиб ҳалок бўлди”, – дейди ёнғинда ичкарида бўлган абитуриент.

“Караокега мен билан бирга кирган икки танишим тутундан чиқиб кета олмади...”

“Танишларим жами 8 киши (4 ўғил, 4 қиз) бўлиб қўшиқ айтиб ўтирганимизда ташқаридан қандайдир овозлар эшитила бошлади. Кейин эса хонамиз тутунга тўлди. Ўрнимдан туриб эшикни очганимда йўлакларни тутун қоплаб бўлган экан. Йўлакка чиқиб караоке биносининг орқа томонидаги эшигини очишга уриндим. Эшик очилмади. Тутундан нафас ололмай ерга йиқилдим. Кейин эса ташқаридаги одамлар мени тортиб олишди. Кейин билсам караокега бирга кирган икки танишим ичкарида қолиб кетиб жони узилган экан,” – дейди тутундан омон чиқишга муваффақ бўлганлардан бири.

“Фарзанди ҳалок бўлган ота-оналарга сабр тилайман”

“Ўғлим эрталаб яхши ниятда ўқув марказидаги сўнгги имтиҳонини топшириш учун уйдан чиқиб кетди. Далада ишда эдим. Уйга келсам маҳалла раислари сўроқлаб келишди. Аввалида бўлган воқеани мендан яширишиб, ўғлимнинг бехос мазаси қочиб қолгани ҳақида айтишди. Бўлган воқеани эшитиб минг таҳликада касалхонага етиб келдим. Яратганга шукр. Болам жиддий лат емаган экан. Ўғлим билан кириб гаплашдим.

Фарзанди ҳалок бўлган ота-оналарга сабр тилайман”, – дейди фарзанди билан шифохонада учрашган она.

Республика шошилинч тез ёрдам илмий маркази Фарғона филиали директор ўринбосари Беҳзод Зияевдан беморлар ҳолати бўйича маълумот олдик.

“Филиалимизга 13 нафар бемор қабул қилинди. Уларнинг 6 нафарида биологик ўлим ҳолати қайд этилган. 7 бемордан бирига номаълум этиологияли газдан ўткир заҳарланиш оғир даражаси ташхиси қўйилиб реанимация бўлимига ётқизилди.

3 нафар бемор номаълум этиологияли газдан ўткир заҳарланиш билан ўрта оғир даражада токсикология бўлимида даволаняпти. Қолган 3 нафар беморга шок залимизда ёрдам кўрсатилмоқда”, – дейди Беҳзод Зияев.

Суд-тиббий экспертизасининг дастлабки хулосасига кўра, 6 киши тутундан заҳарланиш оқибатида ҳалок бўлгани маълум қилинди.

Бош вазир ўринбосари Очилбой Раматов бошчилигида тузилган ҳукумат комиссияси ёнғин билан боғлиқ вазиятни ўрганишда давом этмоқда.

Сарвар Зиёев, Kun.uz
Монтаж устаси: Жаҳонгир Алибоев