Россия хорижликлар учун электрон визалар беришни бошлади

1 августдан бошлаб Россияда РФга турист сифатида ташриф буюриш, меҳмон ёки хизмат сафари, илмий, маданий, ижтимоий-сиёсий, иқтисодий ва спорт тадбирларида қатнашиш истагида бўлган хорижликлар учун ягона электрон визалар бериш тизими ишга туширилди.

Россияга бир марталик ташриф буюриш учун электрон виза 55 мамлакат, жумладан, Германия, Австрия, Италия, Хитой, Шимолий Корея, Индонезия, Мексика, Саудия Арабистони, Кувайт, Уммон, Эрон фуқаролари учун мавжуд. Вьетнам, Камбожа, Мянма давлатлар рўйхатига охирги бўлиб киритилган. АҚШ ва Буюк Британия рўйхатда йўқ.

Электрон виза олиш учун Россия Ташқи ишлар вазирлигининг ихтисослаштирилган веб-сайтида ёки мобил илова орқали сафар санасидан камида тўрт кун олдин ариза тўлдириш керак. Унга аризачининг рақамли фотосурати ва паспорт маълумотлари бўлган саҳифанинг сканери илова қилинади. 

Консуллик йиғими 52 доллардан, олти ёшгача бўлган болалар учун эса 2 доллардан ошмайди. Виза чет эл фуқаросига Россияда 16 кунгача қолиш ҳуқуқини беради. Сафар виза расмийлаштирилган кундан бошлаб 60 кун ичида исталган санада амалга оширилиши мумкин, аммо Россиядан чиқиш санаси виза берилган пайтдан бошлаб 60 кундан кечикиши мумкин эмас.