Техаслик аёл ноодатий тарзда жароҳат олди. Унга бир вақтнинг ўзида илон ва қирғий ҳужум қилган.
64 ёшли Пегги Жонс ўз боғидаги майсани ўраётганида осмондан унинг устига илон қулаган. Ҳодиса 25 июл куни Техаснинг Луизиана билан чегараси яқинидаги Силсби шаҳри ҳудудида рўй берган.
Судралиб юрувчини аёлнинг уйи устидан учиб ўтаётган қирғий улоқтирган ва шу заҳоти ўлжасини яна олиб кетиш учун пастга шўнғиган.
Натижада илон техаслик аёлнинг қўлига осилиб қолган ва унинг юзига ҳужум қила бошлаган, қирғий эса унга тирноқларини ботирган.
«Мен илондан қутулмоқчи бўлдим, аммо у қўлимга ўралиб олди, — дейди Жонс хоним CBS News телекомпаниясига. — Илон юзимга урилди, бир неча бор кўзойнагимга зарба берди… Мен уни итқитиб ташлашга уринардим, аммо у қаттиқ ёпишиб олганди».
Аёл дарҳол илон йиртқич қушнинг «йўқотган» ўлжаси эканини тушунган, чунки ҳужум вақтида у очиқ жойда ишлаётганди, шундай экан, судралувчи дарахтдан қулаши эҳтимоли йўқ эди.
Бу дарҳол тасдиқланади: унга энди қирғий ҳам ҳужум қилади.
«Қирғий ҳам худди илон каби кутилмаганда пайдо бўлди, — дея ҳикоя қилади Жонс. — У қўлимда осилиб турган илонни чангаллаб олди ва уни олиб кетишга уринди. Шу билан бирга, менинг қўлимни ҳам ушлаб олганди. Қирғий илон билан бирга менинг қўлимни ҳам чангаллаб олганди!»
Йиртқич қуш илонни Пегги Жонснинг қўлидан дарҳол ажратиб ололмагач, у тирноқларини бир неча бор аёлнинг қўлига ботиради.
Кураш қирғийнинг ғалабаси билан якунланади ва у ўз ўлжасини олиб учиб кетади, шундан кейин Пегги Жонснинг қотиб қолган турмуш ўртоғи рафиқасини шифохонага олиб кетади.
«Менинг терим санчиб тешилган, кесилган, тирналган ва кучли кўкарган», — дейди Жонс хоним. У ҳужум вақтида илон унинг кўзойнагини синдириб юборганини қўшимча қилган.
Аёл қўшалоқ ҳужум унинг учун жуда оғир тажриба бўлганини таъкидлайди.
Бир вақтнинг ўзида қирғий ва илон билан курашаётганида у жониворлар ўзини ҳалок қилиши мумкинлигидан қўрққан. Ушбу воқеадан кейин унинг уйқуси бузилган.
Шу билан бирга, аёл CBS News учун интервюсида айтишича, Техасда ёввойи жониворлар билан содир бўладиган ҳодисалар— камёб эмас.
«Мен аввал ҳам қирғий илонни аввал ерга ташлаб, кейин кўтариб олганини кўрганман. Улар бу орқали ўлжасини ўлдирмоқчи бўлади», — деган Жонс.
