АҚШда Эрон байроғи туширилган футболкадаги шахс отишма уюштирди

Тергов версиясига кўра, АҚШга кўчиб келган Сенегал фуқароси, 53 ёшли Ндиага Диагне Остинда (Техас штати) икки кишини отиб ўлдирган ва яна 14 кишини яралаган. У Эрон байроғи тасвири туширилган футболка кийган бўлган. Бу ҳақда якшанба, 1 март куни AP агентлиги ҳуқуқни муҳофаза қилувчи органлар вакилига таяниб хабар қилди.

Ўз навбатида, интернетда экстремистларнинг фаолиятини кузатиб борувчи америкалик SITE Intelligence Group компанияси эҳтимолий ҳужумчи ижтимоий тармоқларда “Эрон режими”ни қўллаб-қувватлаган деган хулосага келган.

SITE Intelligence Group қайд этишича, у 2017 йилдан бошлаб Facebook’даги постларида “Исроил ва АҚШ раҳбариятига нисбатан нафрат” ҳам билдирган. 

Остин полицияси эҳтимолий жиноятчини отиб ўлдирган, у Остиндаги барга ҳужум қилишда тўппонча ва милтиқдан фойдаланган.

Остин полицияси раҳбари Лиза Дэвиснинг айтишича, гумонланувчи бар ёнидан бир неча марта машинада ўтган, кейин тўхтаб, ўз йўлтанламаси ойнасидан террасада ва бино олдида турганларга тўппончадан ўқ узган.

Шундан кейин у машинани тўхтатган ва милтиқдан тасодифий йўловчиларга ўқ ота бошлаган. Воқеа жойига етиб келган полициячилар уни отиб ўлдирган, дея аниқлик киритди Дэвис.

Федерал тергов бюроси (ФТБ) махсус агенти Алекс Доран ҳужум мотивацияси номаълумлигини айтди, аммо “мазкур шахсда ва унинг автомобилида терроризм билан эҳтимолий боғлиқликни кўрсатувчи ашёлар топилган”. Дораннинг сўзларига кўра, гап “терроризмнинг эҳтимолий акти” ҳақида кетмоқда.

Терговга ФТБнинг антитеррор гуруҳи жалб этилган бўлиб, у маҳаллий ҳокимиятлар билан биргаликда иш олиб боради.

AFP агентлиги аниқлаштиришича, АҚШ ва Исроилнинг Эронга берган ҳаво зарбаларидан кейин АҚШнинг кўплаб шаҳарларида хавфсизлик чоралари кучайтирилган.

Исроил ва Қўшма Штатлар 28 феврал тонгида Теҳрон ва Эрон ҳудудидаги бошқа жойларга зарбалар берган. АҚШ президенти Доналд Трамп Ислом Республикасининг ядровий дастурини йўқ қилиш ниятида эканини билдирган. У Эрон армиясини қуролни ташлашга, мамлакат аҳолисини эса “тақдирини ўз қўлига олиш”га чақирган.

Эрон Қизил Ярим Ой жамиятининг 1 март тонгидаги маълумотига кўра, зарбалар оқибатида мамлакатда 201 киши ҳалок бўлган, яна 747 киши яраланган. Эрон ОАВ Минаб шаҳрида қизлар мактабига ракета тушиши натижасида 100 нафардан ортиқ киши ҳалок бўлгани, 95 киши яраланганини даъво қилмоқда. Эроннинг олий раҳбари Али Хоминаий ва бир қатор юқори лавозимли куч тузилмалари вакиллари, жумладан мудофаа вазири Азиз Носирзода ҳамда Ислом инқилоби муҳофизлари корпуси қўмондони Муҳаммад Пакпур ҳалок бўлгани тасдиқланган.