АҚШ 4 нафар россиялик тадбиркорга нисбатан санкциялар жорий қилди

АҚШ Молия вазирлигининг Чет эл активларини назорат қилиш бошқармаси (OFAC) тўрт россиялик тадбиркор ва бир юридик шахсни SDN (Specially Designated Nationals) санкциялари рўйхатига киритди. Бу ҳақда 11 август, жума куни АҚШ Ғазначилик департаменти маълум қилди. Шу тариқа, рўйхатга Россия, Латвия ва Люксембург фуқароси бўлган ҳамда Буюк Британияда яшовчи «Альфа-банк» директорлар кенгашининг собиқ раҳбари Петр Авен киритилган. 

Россия ва Исроил фуқароси, «Альфа-Групп» кузатув кенгаши асосчиси Михаил Фридман ҳам санкциялар остида қолди.

Рўйхатга ТНК-ВР собиқ ижрочи директори, «Альфа-Групп» компаниясининг эгаларидан бири, Россия ва Исроил фуқароси Герман Хан киритилган. 

Бундан ташқари, «Альфа-Групп» консорциумининг собиқ назорат пакети эгаси, Россия фуқароси Алексей Кузмичевга нисбатан чеклов чоралари жорий этилмоқда.

«Россиянинг бой элитаси «одатдагидек бизнес қилиш мумкин», деган фикрдан халос бўлиши керак»

Рўйхатдаги юридик шахс - Россия саноатчилар ва тадбиркорлар иттифоқи. «У Украина уруши бошланганидан сўнг режимга қарши жорий қилинган санкцияларга Россиянинг жавоби билан боғлиқ фаолиятда иштирок этяпти», — дея тушунтирди АҚШ Молия вазирлиги.

«Россиянинг бадавлат элитаси Кремл Украинага қарши уруш олиб бораётган пайтда «одатдагидек бизнес қилиш мумкин», деган фикрдан халос бўлиши керак», деди АҚШ молия вазири ўринбосари Уолли Адейемо. «Халқаро коалициямиз Украинага асоссиз босқинга ёрдам берганларни жавобгарликка тортишда давом этади», — дея қўшимча қилди у.

ОАВ: россиялик миллиардерлар таржимаи ҳолини қайта ёзяпти 

Аввалроқ бу шахсларга нисбатан санкциялар Австралия, Канада, ЕИ, Янги Зеландия ва Буюк Британия томонидан санкциялар киритилган эди. 

The Moscow Times нашри 11 август куни россиялик миллиардерлар, жумладан, Forbes рўйхатига киритилганлар Украина уруши бошланганидан бери Россия билан алоқаси ҳақидаги маълумотлардан халос бўлиб, ўз таржимаи ҳолини оммавий равишда қайта ёзаётгани ҳақида маълум қилганди.