Германияда украиналик болага суиқасд иши бўйича тергов бошланди

Гёттинген прокуратураси 26 август куни Айнбек шаҳрида (Қуйи Саксония федерал ери) 10 ёшли украиналик болага нисбатан содир этилган суиқасд иши бўйича тергов ҳаракатларини бошлади. Бу ҳақдаги хабар идора сайтида 1 сентябр, жума куни эълон қилинди. 

Прокуратура маълумотларига кўра, ўша куни соат 18:40 лар атрофида Айнбекдаги кўприк яқинида номаълум шахс украиналик болалар гуруҳига яқинлашган. Нотаниш эркакка болаларнинг украинча гапириши ёқмаган ва у рус тилида гаплашиш кераклигини айтган. Шу билан бирга, у Украина гўёки уруш бошлаганини қўшимча қилган. Шундан сўнг эркак аввал қизнинг сочларини тортган, кейин эса 10 ёшли болани ушлаб кўприк панжарасидан ошиб, каналга улоқтирган. 

Хабар қилинишича, бола боши ва оёғи билан кўприкка маҳкамланган темир тўсинларга тушган. Бола каналда ётганида ҳужумчи унга шиша бутилкани ҳам улоқтирган ва у жабрланувчининг ўнг елкасига теккан. Шундан сўнг эркак воқеа жойидан яширинган. 

Болага шифохонада тиббий ёрдам кўрсатилиб, уйига жўнатилган. Украиналик болаларга ҳужум қилган эркак қидирувга берилган. Прокуратура унинг белгилари ҳақида хабар тарқатган: ёши тахминан 40-45 да, кўк футболка, қора кепка ва жинси шорти кийган. 

Тюрингияда украиналик бола ёнғинда ҳалок бўлди 

4 июн куни Тюрингия федерал ерининг Аполда шаҳридаги қочқинлар ётоқхонасида юз берган ёнғин натижасида украиналик 9 ёшли бола ҳалок бўлгани аниқланди. Яна 10 киши жароҳат олиб, шифохонага етказилган. Фожиа сабабларини аниқлаш бўйича тергов ҳаракатлари олиб борилмоқда.