Германияда экспертлар фуқароларни қишда энергияни тежашга чақирди

Германия Тармоқлар бўйича федерал агентлик (Bundesnetzagentur, BNetzA) раҳбари Клаус Мюллер газ таъминоти учун бу қишда сақланиб қоладиган хатарлар ҳақида огоҳлантирди ва фуқароларни энергияни тежашга чақирди. «Сақлаш омборлари 94 фоизга тўлган ва бизда муқобил таъминот манбалари мавжуд», деди у 2 сентябр, шанба куни нашр этилган Funke медиа-гуруҳига берган интервюсида. «Шунинг учун биз келгуси қиш ҳақида оптимистик позицияга эгамиз. Лекин бу ҳақда гапиришга ҳали эрта, хатарлар сақланиб қолмоқда». 

Мюллернинг қайд этишича, Россия ҳали ҳам Жануби-Шарқий Европага газ етказиб беришда давом этмоқда. Бироқ, агар бу етказиб бериш тўхтатилса, бундай мамлакатлар бошқа манбалардан таъминотга муҳтож бўлади. «Бу ҳолатда Германия муҳим рол ўйнайди», деди расмий. 

У уй эгалари ва ижарачиларни «қишга қўлдан келганча яхшироқ тайёрланишга» чақирди. Масалан, улар газда иситиш тизимини оптимал тарзда созлаши керак. «Газ инқирозгача бўлганидан анча қиммат, - деди Мюллер. - Тежамкорлик нафақат пулни тежаш ва иқлимни яхшилаш, балки ишончли таъминотга ҳам ёрдам беради». 

Истеъмолчиларга мустақил ҳаракат қилиш тавсия этиляпти 

Профессор Вероника Гримм - Германия ҳукуматига иқтисодий масалалар бўйича маслаҳат берадиган кенгаш аъзоларидан бири ҳам «қиш учун яна яхшилаб тайёрланиш» зарурлигини айтди. Унинг сўзларига кўра, мамлакатда газ таъминоти билан боғлиқ вазият умуман олганда яхши. «Одамлар ўтган йилларга нисбатан газни тежамоқда, ҳозирда ўтган йиллардаги ўртача кўрсаткичдан тахминан 20 фоизга камроқ истеъмол қилинмоқда», деди иқтисодчи Funke’га. 

Шу билан бирга, газ омборларини тўлдириш даражаси юқори бўлишига қарамай, уларнинг сиғими газ импортисиз қишни талафотсиз ўтказиш учун етарли бўлмайди, деди Гримм. У истеъмолчиларга энергияни тежаш бўйича мустақил ҳаракат қилишни маслаҳат берди. «Эшик ёки деразаларни зичлаб ёпиш каби оддий чораларни мустақил амалга оширса бўлади», деди эксперт.