Россияда блокланган сайтлар сони бир йил ичида 85 фоизга ошди

Россиядаги Роскомнадзор сўровига кўра, 2023 йилнинг январидан июнигача қонун билан тақиқланган маълумотларга эга 885 мингдан ортиқ сайт блокланди ёки ўчирилди, дея хабар беради «Коммерсант». Бу кўрсаткич 2022 йилнинг биринчи ярмига нисбатан 85 фоизга кўп, деб ёзади газета 7 сентябр, пайшанба куни. Бундай динамика ўтган йили интернет-ресурсларни блоклаш қилиш учун асосларнинг кенгайиши, биринчи навбатда, Россия армияси ҳақида «фейк» маълумотларнинг тарқалишини тақиқлаш билан боғлиқ.

Бундан ташқари, интернет тармоғида блокланган ёки ўчирилган алоҳида материаллар сони 1,1 миллионга етди, бу бутун 2022 йилга нисбатан 10 фоизга кўпдир.

Уруш бошланганидан бери минглаб веб-сайтлар блокланган

2022 йил февралида Россия ҳарбийларининг Украинада ҳарбий ҳаракатлари бошланганидан бери Роскомнадзор Россиядаги минглаб веб-сайтларни, жумладан, кўплаб мустақил оммавий ахборот воситалари, Facebook, Instagram ва Twitter ижтимоий тармоқларини блоклади. Тасдиқланмаган маълумотларга кўра, блоклаш YouTube’га ҳам таъсир қилиши мумкин. Бир неча кун олдин Россия ҳукумати блоклашни четлаб ўтиш учун VPN-йўриқномалари бўлган ресурсларни блоклашни таклиф этди.

Бундан ташқари, идора оммавий ахборот воситаларидан қўшни давлат билан урушни «махсус операция» деб аташни талаб қилди, 2022 йил март ойида эса Россия армиясини «обрўсизлантириш» ва бу ҳақдаги «фейклар» учун жазо жорий этилди. Роскомнадзор судлар, Федерал солиқ хизмати, Росмолодеж ва бошқа идораларнинг қарорлари асосида интернет-ресурсларни блоклайди. Бошқа нарсалар қаторида, Россия ҳукумати мамлакат аҳолисига «чет эл агентлари» материалларини ўқишни тақиқлашга ҳаракат қилмоқда.