Ливияда сув тошқинлари минглаб одамларни денгизга оқизиб кетди

Циклон ва кучли ёғингарчилик мамлакатга жиддий зарар етказди, турар жой бинолари ва ижтимоий объектларни сув босди, минглаб одамлар бедарак йўқолди.

Фото: Anadolu Agency

Ливиянинг Ўртаер денгизи қирғоқларида содир бўлган сув тошқинлари оқибатида минглаб одамлар бедарак йўқолди. Табиий офатга 10 сентябр куни мамлакат шимоли-шарқида юз берган «Даниэл» циклони сабаб бўлган. Энг жиддий зарарни Дерна шаҳри кўрди, унда иккита тўғон вайрон бўлди.

«Тошқин минглаб одамларни денгизга оқизиб кетди. Улар ҳамон бедарак йўқолган деб ҳисобланади», деди Ливия парламенти томонидан мамлакат шарқидаги ҳукуматга тайинланган ички ишлар вазири Эссам Абу Зариб.

Унинг сўзларига кўра, мингдан ортиқ одам табиий офат қурбонига айланган.

Ўз навбатида, Ливия шарқий минтақаси ҳукумати раҳбари Усома Ҳаммад Дерна минтақасида ҳалок бўлганлар сони икки мингдан ошганини айтди.

«Дернада сув тошқинлари бутун бошли маҳаллаларни ювиб кетди, одамларни денгизга оқизди, минглаб одамлар бедарак йўқолди», деди у.

Шу билан бирга, кучли ёғингарчилик ҳам мамлакатга жиддий зарар етказди, турар жой бинолари ва ижтимоий объектларни сув босди.

Ливия ҳукумати мамлакатнинг шарқий ҳудудларида икки кунлик комендантлик соати эълон қилди, табиий офатдан зарар кўрган ҳудудда фавқулодда ҳолат эълон қилинди. Шунингдек, мамлакатда уч кунлик миллий мотам эълон қилинди.