Марокаш зилзиладан кейин тўртта давлатдан ёрдам қабул қилди

Марокаш ҳукумати ёрдамни фақат тўртта давлатдан қабул қилди - Испания, Қатар, Буюк Британия ва БАА. Сўнгги маълумотларга кўра, Шимолий Африкадаги қиролликда зилзила оқибатида 2100 дан ортиқ одам ҳалок бўлган.

Фото: Sylvain Rostaing/Le Pictorium/MAXPPP/dpa/picture alliance

Кучли зилзиладан сўнг Марокаш ҳукумати тўртта «дўст давлат» – Испания, Қатар, Буюк Британия ва Бирлашган Араб Амирликларининг ёрдамини қабул қилишга тайёрлигини маълум қилди, деб хабар берди мамлакат Ички ишлар вазирлиги 11 сентябр, душанбага ўтар кечаси.

Юқорида қайд этилган давлатлар қутқарув хизматлари вакиллари аллақачон Шимолий Африкадаги қиролликда ҳамкасблари билан боғланган, деб ёзади dpa агентлиги. Аввалроқ кўплаб давлатлар, жумладан, АҚШ ва Германия, шунингдек, бутун Европа Иттифоқи зилзиладан жабр кўрган мамлакатга ёрдам таклиф қилган эди.

Уч кунлик мотам

Сўнгги маълумотларга кўра, Марокашдаги зилзила оқибатида камида 2122 киши ҳалок бўлган, яна 2421 киши жароҳатланган. Бир кун аввал фожиа муносабати билан Марокаш қироллик саройи мамлакатда уч кунлик мотам эълон қилган эди.

9 сентябрга ўтар кечаси 6,8 магнитудали зилзила содир бўлди. Марокаш миллий геофизика институти маълумотларига кўра, зилзила эпицентри Марракешдан 70 километр жануби-ғарбда жойлашган Марракеш-Сафи тоғли ҳудудида жойлашган. АҚШ Геологик хизмати маълумотларига кўра, зилзила ўчоғи 18,5 километр чуқурликда жойлашган. Бу Марокашда сўнгги 60 йилдан кўпроқ вақт ичида кузатилган энг кучли зилзила бўлди, дея қайд этади dpa.

#зилзила #Марокаш