Африка футбол конфедерацияси сенсацион қарор қабул қилди – Африка Миллатлар кубоги чемпиони титули Сенегалдан қайтариб олиниб, Марокашга берилди.
Кутилмаган қарор
17 март куни кечқурун Африка футбол конфедерацияси расмий сайтида ташкилот апелляция кенгашининг баёноти пайдо бўлди. Унга кўра, кенгаш Сенегал жамоасига 0:3 ҳисобида техник мағлубият ёзиб, 120 дақиқалик учрашувда мағлубиятга учраганига қарамай, Марокашни Африка Кубоги ғолиби деб эълон қилган.
«Африка футбол конфедерацияси Апелляция кенгаши бугун Африка Миллатлар кубоги қоидаларининг 84-бандига мувофиқ Сенегал жамоасининг Марокаш билан Африка Миллатлар кубоги финал учрашуви натижалари бекор қилингани ҳақида қарор қабул қилди. Энди ўйин натижаси 3:0 ҳисобида Марокаш фойдасига ёзилади», дейилади баёнотда.
Марокаш қироллик федерациясининг Африка Миллатлар кубоги регламентининг 82 ва 84-моддаларини қўллаш бўйича апелляцияси юзасидан кенгаш қуйидаги қарорларни қабул қилган:
- апелляция мақбул деб топилди ва қаноатлантирилди;
- АФК интизомий кенгашининг қарори бекор қилинди (илгари жамоалар мухлислар, ўйинчилар, мураббийлар ва ўйиннинг бошқа иштирокчиларининг номақбул хатти-ҳаракатлари учун жами 615 минг доллар жаримага тортилган эди);
- апелляция кенгаши Сенегал жамоасининг хатти-ҳаракатлари учун Африка Миллатлар кубоги регламентининг 82 ва 84-моддаларини қўллаш мумкин деб ҳисоблайди;
- Марокаш қироллик федерациясининг протести қаноатлантирилди;
- Сенегал футбол федерацияси ўз жамоасининг хатти-ҳаракати билан Африка Миллатлар кубоги регламентининг 82-моддасини бузган;
- Африка Миллатлар кубоги регламентининг 84-бандига мувофиқ, Сенегал жамоасига 0:3 ҳисобида мағлубият ёзилди;
- бошқа барча илтимосномалар рад этилди.
Содда қилиб айтганда, энди марокашликлар расман 2026 йилги Африка кубогининг янги ғолиблари ҳисобланади.
Бундан ташқари, ўйин охиридаги воқеалар (VAR фаолиятига аралашув, болбойлар сочиқ ўғирлаши, мухлислар томонидан лазер қўлланиши) туфайли турли томонларга 50 минг доллардан 100 минг долларгача бўлган жарималар қўлланган.
Финалда нималар бўлганди?
18 январ куни Марокашда бўлиб ўтган финал ўйини натижаси қайтадан кўриб чиқилишига ўша ўйин охиридаги эпизод сабаб бўлди. Ўйин охирида, ҳисоб 0:0 бўлиб турганида арбитр турнир мезбонлари фойдасига бир неча қарор чиқарганди. Аввалига сенегалликларнинг голи бекор қилинган, кейин эса Браим Диасга ишлатилган фол учун Марокаш фойдасига пеналти белгиланганди.
