Қазиб олинадиган ёқилғи даврининг интиҳоси бошланди – ХЭА 

Халқаро энергетика агентлиги (ХЭА) раҳбари Фотиҳ Бирол дунё қазиб олинадиган ёқилғилар даврининг «интиҳоси» бўсағасида турганини айтди. 

«Биз қазиб олинадиган ёқилғи даврининг охири бошланганига гувоҳ бўляпмиз ва кейинги даврга тайёргарлик кўришимиз керак», деди у. 

Ўтган йили ХЭА қайта тикланадиган энергиянинг жадал ривожланиши ва электр транспорт воситаларининг тарқалиши туфайли учта асосий қазиб олинадиган ёқилғига (кўмир, нефт ва газ) умумий талаб 2030 йилда энг юқори чўққига чиқишини башорат қилган эди. Аммо энди башоратини ўзгартириб, бу янада эртароқ юз беришини маълум қилди. «Дунё тарихий бурилиш арафасида», деди Бирол. 

Биролнинг таъкидлашича, ҳатто дунёдаги энг йирик истеъмолчи Хитойда ҳам қайта тикланадиган энергия ва атом энергетикасининг ривожланиши ҳамда иқтисодиётнинг секинлашиши кўмирдан фойдаланишнинг тез суръатда қисқаришидан далолат беради. ХЭА прогнозига кўра, электр транспорт воситаларининг жадал ривожланиши фонида нефтга талаб ҳам пасайишни бошлайди. 2011 йилда эълон қилинган «газнинг олтин даври» ҳам ниҳоясига етмоқда. Масалан, Европа Украинадаги уруш фонида газдан тезкор равишда воз кечмоқда. 

Бирол келажакда нефт ва газ таъминотига маълум инвестициялар зарур бўлишини тан олди, аммо янги қазиб олинадиган ёқилғи лойиҳалари «ташлаб қўйилишидан» огоҳлантирди.  

«Янги, кенг кўламли қазиб олинадиган ёқилғи лойиҳалари нафақат жиддий иқлим хавфларини, балки жиддий молиявий хавфларни ҳам келтириб чиқаради», деди у.