Украина АҚШдан яна 325 миллион долларлик ёрдам олади

Қўшма Штатлар Украинага хавфсизлик учун қўшимча 128 миллион долларлик ёрдам беради, шунингдек, 197 миллион долларлик қурол ва ўқ-дориларни етказади. Бу ҳақда 21 сентябр, пайшанба куни АҚШ президенти Жо Байден Ню-Йоркда Украина президенти Володимир Зеленский билан учрашуви якунида маълум қилди.

Жами 325 миллион долларлик пакетга 155 мм артиллерия снарядлари, Avenger ҳаво мудофаа тизимлари, HIMARS ЯЎРТ учун ўқ-дорилар, УУАларни уриб тушириш учун пулемётлар, танкка қарши ракеталар, бир қатор бошқа қуроллар, 3 миллиондан ортиқ патронлар ва 59 та ҳарбий техника киради. Рўйхатда, шунингдек, ўтмишда Украинанинг баъзи иттифоқчилари томонидан мунозарали тарзда қабул қилинган кассетали ўқ-дорилар ҳам тилга олинган.

Пакетда келажакдаги етказиб беришлар орасида «ҳаво мудофааси учун» ёзуви бўлган AIM-9M Sidewinder ракеталари мавжуд. Бу «ҳаво-ҳаво» ракеталари бўлиб, улар Америка ҳарбий самолётлари томонидан қўлланади - уларнинг рўйхатга киритилиши «F-16’ни келажакда етказиб бериш учун асос бўлиши мумкин», деб таъкидлайди BBC медиа-компаниясининг рус хизмати. Қўшма Штатлар аввалроқ Киевга қирувчи самолётлар етказиб беришни маъқуллаган эди, бироқ бу украиналик учувчилар учун ўқув курслари тугагандан кейингина амалга ошади.

Киев ATACMS ракеталарини ҳозирча олмайди 

Киевга етказиб бериладиган қуроллар янги рўйхатида HIMARS учун ATACMS ракеталари ҳақида гап йўқ. Зеленский ва Байден учрашуви олдидан Америка етакчисининг миллий хавфсизлик бўйича маслаҳатчиси Жейк Салливан улар кейинроқ Киевга етказилиши мумкинлигини айтди. 

АҚШ Мудофаа вазирлиги матбуот котиби Жон Кирби Салливаннинг сўзларини тасдиқлади. «Мен шунчаки айтмоқчиманки, биз украиналиклар билан жанг майдонида уларга нима кераклиги ҳақида гаплашишда давом этамиз», деди у Украина ва АҚШ раҳбарларининг учрашувидан сўнг журналистлар билан суҳбатда. Кирби таъкидлашича, Зеленскийнинг ўзи янги қурол пакетини урушда «айнан унинг кучларига керак бўлган нарса» деб атаган. 

Украина ҳаво мудофаасини қийин қишга тайёрламоқда 

Зеленский билан учрашувдан сўнг журналистлар олдида чиқиш қилган Байден М1 Abrams танкларининг дастлабки партияси «келгуси ҳафта» Украинага етиб боришини ваъда қилди. «Йилнинг энг совуқ ва қоронғи кунларида бизни иссиқ ва ёруғлик билан таъминлайдиган муҳим инфратузилмани ҳимоя қилиш учун Украина ҳаво мудофаасини кучайтиришга ҳам эътибор қаратганмиз», — деди Байден. 

Зеленский, шунингдек, Россиянинг Украина инфратузилмасига ҳужумлари янги тўлқинларини ҳисобга олган ҳолда келаётган қиш олдидан ҳаво мудофаасини кучайтириш зарурлиги ҳақида гапирди. Оқ уйда Байден билан музокаралар бошланишидан олдин у ушбу мавзуни муҳокама қилишни кутаётганини таъкидлади ва учрашувдан сўнг ўзининг Telegram-каналида Байден ва АҚШ Конгрессига Украина билан бирга экани учун миннатдорчилик билдирилган хабарни эълон қилди.