Прокуратура АҚШ Сенати қўмитаси раҳбарини коррупцияда айблади

АҚШ Демократик партияси аъзолари Ню-Жерси штатидан сенатор Роберт Менендесни прокурорлар томонидан унга коррупция бўйича қўйилган айбловлар фонида истеъфога чиқишга чақирди, деб хабар берди dpa 23 сентябр, шанба куни. 

Ню-Жерси штати губернатори Фил Мерфи, штат ассамблеяси спикери Крейг Кофлин ва штат Демократик партияси раиси Лерой Жонс Менендесни истеъфога чиқишга чақирди. Вакиллар палатасининг бир неча аъзоси ҳам шундай баёнотлар берди, деб ёзади Axios портали. 

Бир кун аввал, айбловлар туфайли Менендес АҚШ Сенатининг Ташқи алоқалар қўмитаси раиси лавозимидан вақтинча истеъфога чиқди, деб хабар берди Сенатдаги Демократлар партияси етакчиси Чак Шумер. «Сенатор Менендес бу масала ҳал этилгунга қадар Ташқи алоқалар қўмитаси раиси лавозимини вақтинча тарк этиш тўғрисида тўғри қарор қабул қилди», деб ёзди у. 

Менендес коррупцияда айбланяпти

Менендесга қўйилган айбловлар ҳақида 22 сентябр, жума куни маълум бўлди. Прокуратура сенаторга учта банд бўйича айблов қўйди. Улардан биринчисида айтилишича, у Миср раҳбариятига АҚШ ҳукуматининг махфий маълумотларини топширган, ўз ёрдами учун сенатор ва унинг рафиқаси Надин Менендес нақд пул, олтин қуймалари, ижара тўловлари ва «ҳашаматли машина» кўринишида «юз минглаб доллар» пора олган.

Қолган икки айблов сенаторнинг «жерсилик уч нафар бизнесмен: Уилл Хана, Хосе Урибе ва Фред Дайбеснинг тергов ишига таъсир ўтказиш» уриниши билан боғлиқ. Тергов маълумотларига кўра, Хана бир неча бор Менендес ва Миср расмийлари ўртасидаги шахсий учрашувларда иштирок этган, бунинг натижасида у мамлакат ҳукумати қарорларидан манфаатдор бўлган, унинг компанияси «даромад оқимини таъминлаш» орқали коррупция схемасини тарғиб қилиш учун ишлатилган. Хана сенаторга хотини орқали «ваъда қилган порани берган бўлиши мумкин».

Тинтув чоғида олтин қуймалари топилган

Сенаторга нисбатан жиноий иш 2022 йил октябр ойида очилган. Манҳэттен прокуратураси уни тергов қилиш билан шуғулланган. 2022 йилда сенаторнинг Ню-Жерсидаги уйини тинтув қилиш чоғида терговчилар 480 минг доллар нақд пул, шунингдек, қиймати 100 минг доллардан ортиқ олтин қуймаларни топди. 

Бу Менендесга қарши очилган иккинчи коррупция иши. 2015 йилда у ҳашаматли таътиллар, авиачипталар ва сайлов кампанияси учун хайрия маблағлари эвазига лоббичилик хизматларини кўрсатишда айбланган. 2017 йилда суд айбловларни олиб ташлади. 

Сенатор ҳозирги айбловларни рад этиб, «саҳна ортидаги кучлар» уни «тўхтатишга ва сиёсатдан узоқлаштиришга» уринаётганини айтди. Менендес истеъфога чиқиш нияти йўқлигини айтди.