«Трамп сизнинг ягона иттифоқчингиз» – Вэнс ҳам Исроилни танқид қилди

Оқ уйдаги матбуот анжуманида АҚШ вице-президенти Жей Ди Вэнсдан Исроил бош вазири Бинямин Нетаняҳунинг Эрон билан келишувдан ғазабда экани ҳақида сўрашди. Венс Нетаняҳудан бундай изоҳларни эшитмаганини айтди, бироқ Исроил ҳукумати аъзоларининг АҚШ-Эрон келишувга ва шахсан Трампга ҳужумларини танқид қилди.

«Мен [АҚШ-Эрон] битимини барбод қилиши мумкин бўлган тахминий сценарийларга киришмоқчи эмасман. Чунки, президент Трампнинг кутилмаси шуки, исроилликлар ва минтақадаги арабларнинг барчаси ҳамкорликда иш тутиб, ушбу битимни охирига етказади.

Axios хабарини кўрдим: Нетаняҳу ғазабда эмиш. Бу хабар мен у билан олиб борган суҳбатларни акс эттирмайди. Балки у менга айтмаган нарсаларни бошқаларга айтаётгандир.

Мени ҳақиқатан ҳам ташвишга соладигани бошқа: Биби кабинетидаги баъзи аъзолар битимни очиқдан-очиқ танқид қилганини, баъзи ҳолларда эса улар АҚШ президентини шахсан ҳақорат қилганини кўрдингиз.

Уларга икки хил хабар бермоқчиман:

Биринчидан, Доналд Трамп — ҳозирги дамда бутун дунёда Исроил давлатига ҳамдард бўлган ягона давлат раҳбари. Қолаверса, у дунёдаги ягона ўта қудратли давлатининг раҳбари ҳамдир. Агар мен Исроил ҳукуматида бўлсам, дунёда қолган ягона кучли иттифоқдошимни «нишонга» олмасдим».

US Vice President JD Vance lashed out at Israeli critics of the Iran deal, saying Trump is Israel's 'only powerful' ally, in a sharp rebuke that referenced the billions in US defense aid the country receives https://t.co/83ZRLgPIxG pic.twitter.com/cbOfckihTi

— Reuters (@Reuters) June 18, 2026

У шунингдек, Исроилни ҳимоя қилган мудофаа қуролларининг учдан икки қисми «Америкага тегишли» эканини эслатиб ўтди.

«Иккинчи хабарим, Бибининг ўзи бу йўлга кирмади. Аммо президент Трампни ҳужумга олган Исроилдаги баъзи ҳукумат аъзоларига шуни айтардимки, сўнгги уч ой ичида юртингизни ҳимоя қилган мудофаа қуролларининг учдан икки қисми Америка қўллари билан яратилган ва Америка солиқ тўловчиларининг пуллари ҳисобига тўланган.

Исроилнинг муаммоси – Доналд Трамп эмас. Ўз мамлакатининг энг катта муаммоси АҚШ президенти деб ўйлайдиган ҳар бир исроиллик кўзини очиб, мамлакатнинг ҳақиқий аҳволини кўрсин» деган АҚШ вице-президенти Оқ уйдаги тадбирда.

Reutersʼнинг ёзишича, Қўшма Штатлар Исроилга йилига тахминан 4 миллиард доллар ҳарбий ёрдам кўрсатади. Икки давлат ҳозирда янги ёрдам битими бўйича музокаралар олиб бормоқда.

Нетаняҳу идораси ва Исроил ташқи ишлар вазирлиги Вэнснинг сўзларига изоҳ бермади.

АҚШ ва Исроил ўртасидаги кескинлик кучаймоқда

Исроиллик юқори мартабали мулозимлар АҚШ-Эрон келишувининг шартлари Исроил учун ёмон эканлигини айтиб келмоқда. Уларнинг таъкидлашича, бу фикр Исроил раҳбарияти ўртасида умумий қараш ҳисобланади.

Трамп чоршанба куни Катта еттилик (G7) саммитидаги нутқида Исроилнинг хавотирларини юмшатишга ҳаракат қилди. Трампнинг айтишича, Нетаняҳу Ливандаги Ҳизбуллоҳга қарши курашда «юмшоқроқ ёндашувдан» фойдаланиши мумкин.

Келишув тузилганидан кейинги илк изоҳида Нетаняҳу Исроил АҚШ билан муносабатларини қадрлашини айтди. Бироқ у Исроил шимолий чегараси яқинида Жанубий Ливан оккупациясини давом эттирмоқчи.

«Бу Жанубий Ливандаги хавфсизлик зонасини сақлаб қолишни талаб қилади; Исроилнинг хавфсизлик эҳтиёжлари талаб қилар экан, биз у ерни тарк этмаслигимизни тақозо этади», деди Нетаняҳу.

Исроил пайшанба куни Жанубий Ливанда кенгайтирилган ҳарбий назорат зонасини кўрсатувчи харитани эълон қилди. Шунингдек, у АҚШ-Эрон келишуви шартларига қарши чиққан ҳолда, ушбу зонадан ташқарида ҳам ҳужумлар уюштиришини истисно қилмади.