Володимир Зеленский Канадада расмий ташриф билан бўлиб турибди

Украина президенти Володимир Зеленский 22 сентябр, жума куни Канадада ушбу мамлакат бош вазири Жастин Трюдо томонидан расман қабул қилинди.

Зеленский Канада пойтахти Оттавадаги парламент биносига келди. Оттавада у Трюдо билан музокаралар олиб борди ва парламентда нутқ сўзлади. У Канадага Украинага Россиядан ҳимояланишда кўрсатаётган ёрдами учун миннатдорчилик билдирди. Бу қўллаб-қувватлаш «минглаб одамларнинг ҳаётини сақлаб қолишимизга имкон берди», деб таъкидлади Украина президенти.

Володимир Зеленскийнинг парламентга ташрифи чоғида Жастин Трюдо ўз мамлакати Украина учун зирҳли транспорт воситалари, жумладан, тиббий эвакуаторлар («медэваклар») ишлаб чиқариш учун уч йил давомида қўшимча 650 миллион Канада доллари (тахминан 482 миллион АҚШ доллари) ажратишини маълум қилди. «Украиналиклар совға қилинган самолётлардан максимал даражада фойдаланиши учун» F-16 қирувчи самолётларида украиналик учувчилар ва техникларни ўқитиш мақсадида инструкторлар ҳам юборилади.

Кейинроқ Украина президенти Торонтога йўл олди, у ерда Канада иқтисодиёти ва Украина жамоатчилиги вакиллари билан учрашади. 

Трюдо Зеленскийнинг ташрифини «Канада учун жуда ҳаяжонли кун» деб атади. У Зеленскийнинг канадаликлар «кучли ва сўзсиз қўллаб-қувватлаётганига» шахсан гувоҳ бўлиш имкониятига эга бўлганидан мамнунлигини билдирди. Зеленский Канаданинг Украинани қўллаб-қувватлагани учун миннатдорчилик билдирди. 

«Мен украиналиклардан жуда кўп илиқ сўзлар ва миннатдорчиликлар олиб келдим. Канада ажойиб мамлакат. У гўзал эканлигини биламан, лекин ҳозир уни кўришга вақтим йўқ. Ғалабадан кейин бу ерга қайтамиз, балки болаларимиз билан», - деди Зеленский.

Зеленскийнинг Канадага уруш бошланганидан бери биринчи ташрифи 

Бу Володимир Зеленскийнинг 2022 йил февралида Россия ҳарбийларининг Украинада ҳарбий ҳаракатлари бошланганидан бери Канадага биринчи ташрифи ва унинг Шимолий Америка сафаридаги учинчи тўхташ жойи. 18 сентябр куни Зеленский БМТ Бош ассамблеясида иштирок этиш учун Ню-Йоркка борди, бир кун олдин эса Вашингтонга ташриф буюрди ва у ерда АҚШ Конгресси аъзолари билан учрашди ҳамда Оқ уйда АҚШ президенти Жо Байден томонидан қабул қилинди. 

22 сентябрга ўтар кечаси кутилмаганда Канадада қўшимча тўхташ эълон қилинди. 

Зеленскийнинг жорий сафари мақсадларидан бири - урушдан чарчаган скептикларни унинг йўналиши тўғрилигига ишонтириш ва ҳозирда Москва билан музокаралар нима учун мумкин эмаслигини тушунтириш. Бу сафар Зеленский аввалги хорижий ташрифларга қараганда камроқ кескин баёнотлар берди ҳамда ғарб иттифоқчиларининг Украинага кўрсатаётган ёрдамидан миннатдор эканини кўп бора таъкидлади.