ЖЧ кундалиги. 1/8 финалнинг илк иштирокчиси маълум, Корея лагерида можаро, Кабо-Верде сардорида муаммо

Жаҳон чемпионатида плей-офф босқичи старт олди. 1/16 финалнинг дастлабки ўйинида Канада ва ЖАР миллий жамоалари куч синашди. Канадаликлар гуруҳда биринчи ўринни ололмагани туфайли ўйинни Ванкуверда эмас, Лос-Анжелесда ўтказишига тўғри келди. Кўп соатлик сафарда чарчаган футболчилар майдонда катта қийинчиликка учради ва фақат ўйинга қўшиб берилган дақиқаларда ғалаба голини уришга муваффақ бўлишди.

Майдон ташқарисида ҳам қизиқарли воқеалар давом этмоқда: Кабо-Верде сардори Райан Мендеш жинсий зўравонликда айбланмоқда, Жанубий Корея президенти Ли Жэ Мен миллий жамоанинг жаҳон чемпионатини тарк этиши юзасидан текширув ўтказишни буюрди, ФИФА раҳбари Жанни Инфантино эса экологияга зарар етказишда айбланмоқда.

Канада қийинчилик билан ЖАРни таслим этди

ЖАР – Канада 0:1
Гол: Эуштакиу, 90+2 (0:1)
ЖАР: Уилямс, Мбокази, Окон, Модиба, Мудау, Мокоэна, Ситоле, Мофокенг (Мбата, 46), Апполлис, Масеко (Мореми, 86), Макгопа (Райнерс, 86)
Канада: Крепо, Корнелиус, Бомбито (Де Фужерол, 59), Ларея, Жонстон, Эуштакиу, Салиба (Сигур, 59), Миллар (Шаффелберг, 70), Бюкенен (Дэйвис, 75), Ж. Дэвид, Олувасейи (П. Дэвид, 70)
Огоҳлантиришлар: Салиба, 54. Сигур, 67

Канадаликлар гуруҳ босқичини барқарор ўтказа олишмаганди. Дастлаб Босния билан ўйинда дуранг қайд этилган (1:1), иккинчи турда Қатар дарвозасига истаганча гол уришган (6:0), сўнгги турда Швейцарияга мағлуб бўлишганди (1:2). Аммо Жесси Марш шогирдларига 4 очко ҳам квартетда иккинчи ўринни олиш учун етарли бўлди ва жамоа плей-оффда ЖАР билан ўйнади.

1/16 финални очиб берган ушбу учрашувга интригани рэпер Дрейк ошириб берди. Канадалик машҳур мусиқачи ўз ватандошлари кейинги босқичга ўтиши учун 770 минг доллар тикканди. Аввалига канадалик мухлислар уни танқид қилишни бошлашди, чунки у доим ўйин натижалари учун пул тикканда ютқазган, интернетда бу борада «Дрейк тавқи лаънати» деган тушунча ҳам пайдо бўлган.

Канада эса ўйин давомида устунлик қила олмади. Жамоада бир неча хавфли вазиятлар юзага келди, аммо футболчилар бундан фойдалана олишмади.

Ўйин овертаймларга қараб кетаётганди, аммо 90+2-дақиқада Стивен Эуштакиу жарима майдони яқинида тўпни қабул қилди ва чап пастки бурчак томон кучли зарба бериб, ҳисобни очди. Қолган дақиқаларда африкаликлар вазиятни ўзгартира олишмади.

Канада энди кейинги босқичда Марокаш ва Нидерландия жуфтлигига қарши ўйнайди.

Корейслар норози

Хон Мен Бо шогирдлари дастлабки турда Чехияни мағлуб этиб (2:1), турнирни аъло кайфиятда бошлашганди. Лекин кейинги икки турда Мексика ва ЖАРдан 0:1 ҳисобларида мағлуб бўлишди ва турнирни тарк этишди. Энди бу муваффақиятлик учун айнан бош мураббийни айбдор қилишмоқда.

57 ёшли мутахассис натижа учун узр сўради ва масъулиятни ўз зиммасига олди. Аммо маҳаллий жамоатчилик буни шу ҳолида қолдирмоқчи эмас. Мамлакат президенти Ли Жэ Мен эса оловга мой қуйди.

«Агар қобилиятли одамларни эмас, ўз одамларингизни афзал кўрсангиз ва раҳбарлик лавозимларига лаёқатсиз одамни танласангиз, натижа олдиндан маълум бўлади... Маданият, спорт ва туризм вазирлигидан ушбу воқеанинг тафсилотларини синчиклаб ўрганишни сўрайман», – дея ёзган ушбу сиёсатчи ижтимоий тармоқда.

Энди мураббийнинг юзи давлат телевидениесида блур қилинмоқда, дўконлар ва ресторанлар эшиклари олдида эса «Хон Мен Бо Кириши тақиқланади» деб ёзилган табличкалар ўрнатилмоқда.

Уругвайлик футболчилар ташлаб кетилди

Уругвай миллий жамоаси жаҳон чемпионатидаги иштирокини гуруҳ босқичидаёқ якунлади. Марсело Биелса шогирдлари учинчи турда Испанияга 0:1 ҳисобида ютқазди ва H гуруҳида икки очко билан учинчи ўринни эгаллаб, плей-офф босқичига чиқа олмади.

Marca нашри ёзишича, шундан кейин Уругвай футбол ассоциацияси миллий жамоа футболчиларини Мексикадан Монтевидеога олиб қайтиш учун олдиндан брон қилинган чартер рейсни бекор қилган. Испания билан ўйин Мексиканинг Сапопане шаҳрида бўлиб ўтган. Чартер рейс бекор қилингач, футболчилар, мураббийлар штаби аъзолари ва бошқа ходимлар уйга одатий рейсда қайтишига тўғри келган.

Бу Уругвай миллий жамоаси атрофидаги илк можаро эмас. Манбаларга кўра, Испанияга қарши ҳал қилувчи ўйин олдидан футболчилар ва бош мураббий ўртасида келишмовчилик юзага келган. Эрнесто Валверде бошчилигидаги бир гуруҳ футболчилар 3 очко билан ҳам плей-оффга чиқиш мумкинлигини инобатга олган ҳолда ҳимоявий услубда ўйнашни таклиф қилишган, мураббий эса бунинг аксини - кучли прессингга асосланган футбол ўйнашни талаб қилган. Бу мавзу муҳокама қилинган йиғилишни футболчилар намойишкорона тарк этишган. Якунда мураббий кўрсатмаларига амал қилмаган жамоа турнирни ҳам тарк этди.

Инфантино етказаётган зарар

ФИФА раҳбари Жанни Инфантино ҳар куни икки, баъзида учта ўйинга ташриф буюраётгани акс этган кадрлар чиқмоқда. BBC журналистларига кўра, у гуруҳ босқичининг имкон қадар барча ўйинларига кириш учун хусусий жетдан фойдаланган.

Баҳоларга кўра, жаҳон чемпионати бошланганидан буён унинг самолёти 66 соатдан ортиқ вақт мобайнида ҳавода бўлиб, 31 144 миля (50 122 км) масофани учиб ўтган. Суриштирувда экология масаласига алоҳида эътибор қаратилган: унинг парвозларидан иқлимга етказилган зарар тахминан 78 кишининг йиллик иссиқхона газлари чиқиндиларига тенг.

Кабо-Верде сардори оғир жиноятда айбланмоқда

«Кўк акулалар» сенсация кўрсатиб, Испания, Уругвай ва Саудия Арабистони жойлашган гуруҳда иккинчи ўринни олган ҳолда плей-оффга чиқишди, жамоа дарвозабони Возиня эса жаҳон миқёсидаги юлдузга айланди. Лекин жамоа сардори Райан Мендешда жиддий муаммо юзага келди.

Globo хабарига кўра, 36 ёшли футболчини жинсий зўравонликда айблашмоқда. Ҳодиса 27 март куни Окленддаги (Янги Зеландия) меҳмонхонада рўй берган, ўшанда Кабо-Верде миллий жамоаси ўртоқлик учрашуви олдидан ўша ерда тўхтаганди. Маҳаллий футбол
федерацияси томонидан таржимон сифатида ёлланган қизнинг даъво қилишича, Мендеш унинг хонасига бостириб кирган, бўғган, урган, тишлаган ва қаршилик кўрсатишига қарамай, зўрлаган.

ФИФА ҳолат юзасидан текширув бошланганини маълум қилди.

«Халқаро футбол федерацияси Янги Зеландия расмийлари билан алоқада. Ҳозирги вақтда қўшимча изоҳ бера олмаслигимизни тўғри қабул қилишингизни сўраймиз», – дейилади баёнотда.

Компютер Францияга ишонмоқда

Гуруҳ босқичи якунлангач, Opta суперкомпютери 2026 йилги жаҳон чемпионати фаворитлари бўйича тахминларини янгилади.

Дастур таҳлилларига кўра, ғолиблик учун энг катта имконият Францияда. Диде Дешам шогирдларининг бош совринни қўлга киритиш имкониятлари 18,66 фоизга тенг деб баҳоланмоқда. Рейтингда иккинчи ўринни Аргентина (16,26 фоиз), учинчини – Испания (13,47 фоиз) эгаллаб турибди.

Шунингдек, Англия (9,68 фоиз), Бразилия (6,47 фоиз) ва Нидерландиянинг (5,11 фоиз) имкониятлари нисбатан юқори баҳоланмоқда.

Навбатдаги ўйинлар

29 июн куни кечқурун 30 июн тонгида 1/16 финал доирасида учта учрашув бўлиб ўтади.

29 июн. 22.00. Бразилия – Япония

30 июн. 01.30. Германия – Парагвай

30 июн. 06.00. Нидерландия – Марокаш