ЕИ санкцияларга қарамай, Россиядан металл импорт қилишда давом этмоқда

Европа Иттифоқининг Украинага қарши уруш туфайли Россияга қарши бир неча марта санкциялар киритганига қарамай, муҳим хомашё учун савдо истиснолари сақланиб қолмоқда ва Европа компаниялари Кремл билан боғлиқ кончилик корхоналарига миллиардлаб евро тўлашда давом этмоқда, дея хабар беради Investigate Europe суриштирув портали 24 октябр, сешанба куни чоп этилган материалда. 

2022 йил феврал ойида Россиянинг Украинага қуролли бостириб киришидан бери Европа Иттифоқи давлатлари Россияга қарши 11 та санкция пакетини, жумладан нефт, кўмир, пўлат ва ёғоч каби хомашёларни қора рўйхатга киритган. Журналистларнинг таъкидлашича, Европа Иттифоқи томонидан муҳим деб ҳисобланган жами 34 та минерал Россиядан Европага жуда катта миқдорда етказиб берилмоқда, бу Россия давлат корхоналари ва олигархларига тегишли компанияларни муҳим пул ресурслари билан таъминлайди. 

Investigate Europe маълум қилишича, ўтган йил март ойидан бери Россиядан Европа Иттифоқига металл импорти ҳажми 13,7 миллиард еврони ташкил қилган. Жорий йилнинг январ ойидан июл ойигача Европа компаниялари 3,7 миллиард евродан ортиқ рус металларини, шу жумладан никелни – 1,2 миллиард евро миқдорда импорт қилди. European Policy Centre маълумотларига кўра, Европада ишлатиладиган никелнинг айрим турлари 90 фоизи Кремлга яқин бўлган етказиб берувчилардан келади. 

Фойдали бизнес 

Журналистлар аниқлашича, энг йирик титан ишлаб чиқарувчиси, «Ростех»га тегишли «Корпорация ВСМПО-АВИСМА» 2022 йил февралидан 2023 йил июлигача Германия ва Буюк Британиядаги воситачилар ёрдамида Европа Иттифоқига камида 308 миллион долларлик титан сотган. 

«Корпорация ВСМПО-АВИСМА»нинг энг йирик мижозлари орасида Airbus аэрокосмик концерни ҳам бор, у 2022 йилнинг мартидан 2023 йилнинг мартигача Россиядан камида 22,8 миллион долларга титан импорт қилган, бу аввалги даврга нисбатан тўрт баравар кўп, деб хабар беради Investigate Europe.

Европага металларнинг яна бир йирик етказиб берувчиси - олигарх Владимир Потанинга тегишли «Норникел». 2022 йилнинг мартидан 2023 йилнинг июлигача ушбу компания Финландия ва Швейцария воситачилари ёрдамида Европа Иттифоқига 7,6 миллиард долларлик никел ва мис экспорт қилди. 

Олег Дерипаскага тегишли «Русал ҳам йирик металл етказиб берувчи ҳисобланади. Украинада уруш бошланганидан бери бу компания Европа Иттифоқига 2,6 миллиард долларлик алюминий импорт қилган. 

Россия компанияларининг мижозлари 

Россия металларининг энг йирик харидорлари орасида Германиянинг GGP Metal Powder (уруш бошланганидан бери 66 миллион долларлик мис), Франциянинг қурол ишлаб чиқарувчи Safran ширкати (25 миллион долларлик титан), Грециянинг Elval Halcor (алюминий учун 13 миллион доллар) ва Нидерландиянинг C. Steinweg логистика фирмаси (100 миллион долларлик турли металлар) бор.

Жорий йилнинг май ойида Буюк Британия Россиядан металлар, жумладан алюминий, никел ва мис етказиб беришга эмбарго жорий қилди. Лондон ҳукумати Россия металл ишлаб чиқарувчиларига ҳам санкциялар киритди.