Аббос Ғазода хавфсизликни назорат қилишга тайёрлигини тасдиқлади

Фаластин миллий маъмурияти (PNA) раҳбари Маҳмуд Аббос 10 ноябр куни Ғарбий соҳилдаги Фаластин ҳукумати Исроилнинг ҳарбий амалиёти якунланганидан сўнг Ғазо секторида хавфсизликни таъминлашга тайёрлигини айтди. Бу ҳақда The Jerusalem Post хабар берди.

«Ғазо сектори Фаластин давлатининг ажралмас қисмидир ва биз Ғарбий соҳил, жумладан Шарқий Қуддус ва Ғазо сектори учун кенг қамровли сиёсий ечимнинг бир қисми сифатида бунинг учун жавобгар бўламиз», деди Аббос.

Исроилнинг ҳарбий амалиёти якунланганидан кейин Ғазо секторидаги бошқарув мавзуси минтақа ва Ғарб сиёсатчилари орасида фаол муҳокама қилинмоқда. Худди шундай баёнотни бир кун аввал Аббоснинг вориси деб аталган фаластинлик сиёсатчи Ҳусайн аш-Шайх ҳам айтган эди. У АҚШ Давлат котиби Энтони Блинкенга Фаластин миллий маъмурияти Ғазо сектори раҳбариятини ўз қўлига олиш имконияти ҳақида умуман ижобий фикрда эканини айтган. Бироқ, унинг сўзларига кўра, агар АҚШ маъмурияти фаластинликларнинг Исроил билан можаросини кенг қамровли сиёсий йўл билан ҳал қилишга, яъни Фаластин давлатини яратишга кўмаклашиш мажбуриятини олган тақдирдагина фаластинликлар бунга тайёр.

Айни пайтда Исроил бош вазири Бинямин Нетаняҳу 10 ноябр куни Исроил ҳарбийлари анклавдаги ҳарбий операция якунланганидан кейин Ғазо сектори устидан назоратни сақлаб қолишини ва у ерда халқаро кучларни жойлаштириш ҳақида гап йўқлигини айтди.

Шу билан бирга, сўнгги ҳафталарда АҚШ расмийлари Ғазодаги хавфсизликни халқаро кучлар, хусусан, қўшни араб давлатларининг ҳарбий хизматчилари ҳал қилишини таклиф этишди. Кейин назорат фаластинликларга қайтарилиши керак ва Вашингтоннинг фикрича, Ғарбий Соҳилдаги Фаластин маъмурияти вакиллари бу вазифани ўз зиммасига олади.