Қотиллик учун 13 йилга қамалган паралимпиячи Писториус озодликка чиқади

Маъшуқасини ўлдирган спортчи қамоқда бор-йўғи 2 йил ўтирди. У шартли равишда қўйиб юборилади.

Фото: AFP

Жанубий Африкада маъшуқаси Рева Стэнкампни ўлдирганликда айбланиб, 13 йилга қамалган паралимпиячи спортчи Оскар Писториус 2024 йил 5 январда озодликка чиқади. BBC News хабарига кўра, бу қарор махсус комиссия томонидан спортчининг илтимосига биноан кўриб чиқилган ва қабул қилинган.

Шундай қилиб, Писториус қотиллик учун бор-йўғи икки йилга яқин қамоқ жазосини ўтайди.

Оскар Писториус — дунёдаги энг машҳур Паралимпия спортчиларидан бири. У бир ёшида икки оёғидан айрилган ва махсус протезда ҳаракатланади. Писториус 2013 йил феврал ойида Преториядаги уйида Рева Стэнкампни ванна эшиги ортидан отиб ўлдирган. Бу қилмишини уйига ўғри кирган деб ўйлагани билан изоҳлаган. Прокурорлар қотиллик қасддан қилинганини, Писториус аввал ҳам аёлларга нисбатан тажовузга мойиллигини кўрсатганини таъкидлаган.

2014 йилда суд уни қотилликда айблаб, беш йилга озодликдан маҳрум этди. Аммо Олий Апелляция суди уни қасддан одам ўлдиришда айбдор деб топди ва ишни янги суд муҳокамасига қайтарди. 2016 йил ёзида у 6 йилга қамалди. Лекин ҳукм яна қайта кўриб чиқилди - суд Писториусни ҳибсда ўтирган вақтини чегириб ташлаб, 13 йиллик қамоқ жазосига маҳкум қилди.