Самарқанд, Тошкент, Бухоро ва Фарғона шаҳарларида араб ресторанларини очиш таклифи билдирилди.
Ўзбекистон элчихонасида Кувайтнинг йирик хусусий сармоядорларидан бири — Холид ал-Ҳабши билан музокаралар ўтказилди.
“Дунё” хабарига кўра, учрашув давомида сайёҳлик инфратузилмани ривожлантиришга хорижий инвестицияларни жалб этиш масалалари муҳокама қилинди.
Холид ал-Ҳабши Самарқанд, Тошкент, Бухоро ва Фарғона шаҳарларида араб ресторанларини очиш таклифини билдирди. Ушбу лойиҳаларнинг барчаси кувайтлик инвесторнинг тўғридан тўғри жалб этиладиган маблағлари ҳисобига амалга оширилиши маълум қилинди.
Кувайт томони, шунингдек, Ўзбекистонда меҳмонхона бизнесига ҳам сармоя киритишга қизиқиш мавжудлигини таъкидлади. Музокаралар якунида томонлар билдирилган таклифларни ҳаётга татбиқ этиш масалаларини Ўзбекистоннинг тегишли ташкилотлари билан муҳокама қилиш учун алоҳида учрашув ташкил этиш тўғрисида келишиб олишди.
