Ўзбекистонда 2023 йилда 5,5 мингта кибержиноят содир этилди

Президент ҳузуридаги IT соҳасига бағишланган йиғилишда киберхавфсизлик масалалари муҳокама қилинди.

Фото: Reuters

Президент Шавкат Мирзиёев раислигида IT инфратузилмасини яхшилаш, соҳа ва тармоқларни рақамлаштириш юзасидан йиғилиш ўтказилди.

Унда IT соҳаси ривожлангани сари киберхавфсизликни таъминлашнинг долзарблиги қайд этилди.

Таъкидланишича, 2023 йилнинг 11 ойида 5,5 мингта кибержиноят содир этилган. Шундан 70 фоизи банк карталари билан боғлиқ фирибгарлик ва ўғирлик жиноятлари ҳисобланади.

Бугунги кунда Ўзбекистонда 50 га яқин тўлов тизими бўлиб, уларнинг ҳаммаси ҳам киберхавфсизлик талабларига жавоб бермаслиги қайд этилди.

Мутасадди вазирлик ва идораларга барча электрон тўлов тизимлари учун ягона киберхавфсизлик талабларини ишлаб чиқиш ва ижросини қатъий назорат қилиш топширилди.

IT хизматлари ҳажмини 20 триллион сўмга, экспортни 800 миллион долларга етказиш, тармоқларда 130 та ахборот тизимини жорий қилиш ва 750 та давлат хизматини тўлиқ рақамлаштириш борасидаги режаларни ишлаб чиқиш муҳимлиги қайд этилди.

Тайёрлаган: Сардор Юсупов

#Шавкат Мирзиёев #киберхавфсизлик IT