Ўрмон фонди ерлари E-ijara орқали ижарага берилади

Вазирлар Маҳкамасининг «Давлат ўрмон фонди ер майдонларидан фойдаланишда ижара муносабатларини такомиллаштириш чора-тадбирлари тўғрисида»ги қарори қабул қилинди.

2024 йил 1 январдан:

ўрмон фондининг фойдаланилмаётган ер участкаларини жисмоний ва юридик шахсларга ижарага бериш бўйича материалларни тўплаш, кўриб чиқиш, ваколатли органлар ва ташкилотлар билан келишиш E-ijara ахборот тизими орқали амалга оширилади;
ўрмон фондининг фойдаланилмаётган ер участкаларини E-auksion платформаси орқали ижарага беришда қуйидаги ҳолларда ижара тўловининг «нол» ставкаси қўлланилади, бунда:
ўрмон фондининг сув билан таъминланмаган ва ўрмон билан қопланмаган ер участкалари ўзлаштирилиб, қишлоқ хўжалиги экинлари ва доривор ўсимликлар плантацияларини барпо этиш учун –  3 йил давомида;
ўрмон фондининг сув билан таъминланмаган ва ўрмон билан қопланмаган ер участкалари ўзлаштирилиб, ёнғоқ мевали боғлар (писта, бодом, ёнғоқ) ва тез ўсувчи дарахтлар (павлония, терак ва бошқа) плантацияларини барпо этиш учун – 5 йил давомида;
ўрмон фондининг чўл ҳудудларида жойлашган, сув билан таъминланмаган ва ўрмон билан қопланмаган ер участкалари ўзлаштирилиб, чўл ва яйлов ўсимликлари (саксовул, черкез, қандим, қорабуроқ ва бошқа) плантацияларини барпо этиш учун – 10 йил давомида.

2024 йил 1 июлга қадар ўрмон фонди ер участкаларини ижарага бериш бўйича амалдаги барча шартномалар Кадастр агентлиги органларида рўйхатдан ўтказилади, бунда жисмоний шахслардан ижара ҳуқуқини давлат рўйхатидан ўтказганлик учун йиғим ундирилмайди.

Рўйхатдан ўтказилмаган шартномалар бекор қилиниб, ер участкалари онлайн-аукционга чиқарилади.

Ўрмон фонди ер участкаларини электронь онлайн-аукцион орқали ижарага беришнинг маъмурий регламенти тасдиқланмоқда.

Ўрмон фонди ерлар 3 йилдан 49 йилгача қуйидаги мақсадлар ва ўлчамларда ижарага берилади:

ўрмон барпо қилиш учун – 1 гектардан 20 гектаргача;
мевали ва ёнғоқ мевали дарахтзорлар барпо этиш учун – 1 гектардан 20 гектаргача;
мевали ва манзарали кўчат етиштириш учун–0,1 гектардан 2 гектаргача;
тез ўсувчи дарахт плантацияларини барпо этиш учун – гектардан 10 гектаргача;
қишлоқ хўжалиги экинларини экиш учун –0,1 гектардан 10 гектаргача;
доривор ўсимликлар маданий плантацияларини барпо этиш учун – 1 гектардан 20 гектаргача;
асаларичилик фаолияти учун – 0,01 гектардан 2 гектаргача;
балиқчилик фаолияти учун – 0,1 гектардан 5 гектаргача;
овчилик фаолияти учун –0,1 гектардан 2 гектаргача (овчиларни қабул қилиш пункти учун);
лимонарий ва иссиқхоналар ташкил этиш учун –0,1 гектардан 2 гектаргача;
экологик туризм, рекреация, соғломлаштириш ҳамда дам олиш масканлари фаолияти учун (ўсимлик ва ҳайвонот дунёсига зарар келтирмаслик шарти билан) – 0,01 гектардан 2 гектаргача.