Прокурор Навалний штабининг собиқ бошлиғига 10,5 йил сўради

Томсклик фаолга ҳукм 29 декабр куни эълон қилиниши керак. У экстремизм ҳақидаги модда бўйича судланмоқда. Таъқибга Фадееванинг Навалний штабида ишлаши сабаб бўлди.

Фото: РИА Новости

Прокурор экстремизмда айбланаётган томсклик фаол Ксения Фадеевани 10 йил-у 6 ой қамоқ жазосига ҳукм қилишни сўраган. Бу ҳақда 28 декабр, пайшанба куни Фадееванинг Telegram'даги қўллаб-қувватлаш гуруҳи хабар берди.

Ёрдам гуруҳига кўра, Томск Совет судида бўлиб ўтган суд жараёнида пайшанба куни судя Худяков қолган барча ҳимоя гувоҳларини сўроқ қилишдан бош тортган ва томонлар ўртасидаги эшитувга киришган. Прокурор Роман Болдирев айбланувчининг айбини таъкидлаб, 10,5 йил умумий режимдаги колонияни сўради. Фадеева жума куни сўнгги сўзини айтади, шундан сўнг ҳукм эълон қилиниши кутилмоқда.

Фадеевага қарши иш

Томск шаҳар думаси депутати Ксения Фадеева ўз мансаб мавқейидан фойдаланган ҳолда «экстремистик ҳамжамият» фаолиятини ташкил этишда ҳамда «фуқароларнинг шахси ва ҳуқуқларини бузувчи нотижорат ташкилотда иштирок этишда» айбланмоқда. Таъқибга унинг Навалнийнинг штабида ишлаши сабаб бўлган.

Фадеева 2021 йилнинг декабрида қўлга олинган. 2023 йил август ойида депутатнинг иши кўриб чиқиш учун судга юборилган. Мажлислар ёпиқ эшиклар ортида ўтказиляпти.

2023 йил октябр ойининг охирида Фадееванинг эҳтиёт чораси муайян ҳаракатларни тақиқлашдан уй қамоғига ўзгартирилди. 13 ноябр куни эса суд уни давлат айбловчисининг илтимосига биноан тергов изоляторига жўнатди. «Мемориал» Фадеевани сиёсий маҳбус деб билади.