Россиядан ЕИга олмос импортига қўйилган тақиқ кучга кирди

1 январ, душанба куни Россиядан Европа Иттифоқига носаноат табиий ва синтетик олмослар ҳамда заргарлик буюмларини тўғридан тўғри олиб киришга тўлиқ тақиқ кучга кирди. Бу Европа Иттифоқининг Россия Федерациясига қарши илгари қабул қилинган 12-санкция пакетига мувофиқ амалга оширилмоқда.

Учинчи мамлакатларда қайта ишланган рус олмосларига Европа эмбаргоси   кейинроқ - 2024 йил 1 мартдан 1 сентябргача кучга киради. Экспертлар ҳамжамиятига кўра, Россия олмос савдосидан йилига 3,7 млрд евродан 4,6 млрд еврогача даромад олади, деб эслатади AFP.

Нефт нархи чегараси бўйича шартлар кучайтирилиши 

Бундан ташқари, 12-санкция пакети Россия нефтининг учинчи давлатларга экспорти бўйича нарх чегарасини кучайтиришни назарда тутади. Европа компаниялари Россия Федерациясидан Ғарб давлатлари томонидан киритилган нефт учун «нарх шифтига» риоя қилаётгани тўғрисида далилларни тақдим этиши керак бўлади. 

Пакет, шунингдек, Россияга экспорти Европа Иттифоқининг чекловчи чораларига дучор бўлган товарлар рўйхатини кенгайтиради. Бошқа нарсалар қаторида, тақиқ литийли батареялар, термостатлар ва кимёвий маҳсулотларнинг бир қатор тоифаларини ўз ичига олади. Бундан ташқари, янги санкциялар пакети доирасида Европа Иттифоқи Украинага қарши урушни қўллаб-қувватловчи 140 дан ортиқ жисмоний ва юридик шахсларга нисбатан чекловлар жорий қилди. 

АҚШнинг янги санкциялари

Аввалроқ, 22 декабр куни АҚШ президенти Жо Байденнинг фармони билан молиявий институтлар Россия ҳарбий-саноат комплекси манфаатларини кўзлаб, Россиянинг Украинадаги урушини қўллаб-қувватласа, уларга нисбатан янги санкциялар қўлланиши мумкинлиги маълум бўлган эди.

Россия мудофаа саноати манфаати йўлидаги фаолият учун молия институтлари Вашингтоннинг санкциялари рўйхатига киритилган «ҳар қандай шахс манфаатларини кўзлаб ёки унинг номидан муҳим операцияларни амалга оширган» ёки бундай операцияларни амалга оширишга ёрдам бергани учун жазоланиши мумкин. Бундай битимлар чекловларга дуч келади, дейилади ҳужжатда.