Украина танкчилари Авдийивка яқинида янги жангларга тайёрланмоқда. Уруш суратлари

Украинада урушнинг 680-куни ўтди. Асосий маълумотлар:

Россия мудофаа вазирлиги Қрим устида ўнта авиация ракетаси уриб туширилганини маълум қилди. Севастополда ракета парчалари тушиши оқибатида бир киши жароҳатланган. Украина қуролли кучлари эса РФ қўшини қўмондонлик пунктига зарба берилганини айтмоқда.
Украина разведкаси Челябинскдаги ҳарбий аэродромда ўтказилган «махсус амалиёт» вақтида Су-34 бомбардимончи самолётига ўт қўйиб юборилганини маълум қилди.
The Wall Street Journal нашри Россия кичик масофага ҳаракатланувчи баллистик ракеталар харид қилиш бўйича Эрон билан музокаралар олиб бораётганини маълум қилди.
Россия қўшини Харкив ва Курахово бўйлаб ракета зарбалари йўллади.
Россия қўшини зарбаларидан кейин Кропивницкда энергетика инфратузилмасининг икки объекти шикастланган. Бир киши ҳалок бўлиб, яна саккиз киши яраланган.
Reuters хабарига кўра, россиялик ҳакерлар «Киевстар» оператори тизимига киберҳужумдан етти ой олдин — 2023 йил май ойидаёқ бузиб киришган.
АҚШ Путин Украинада ўт очишни тўхтатиш бўйича музокаралар бошлашга тайёрлигининг аломатлари йўқлигини маълум қилди.
Путин армияда хизмат қилиш бўйича шартнома имзолаган хорижликларни Россия фуқаролигига қабул қилиш тўғрисидаги фармонини имзолади.

Донбасс шимолидаги украин танкчилари

Украина ҚК 59-механизациялашган бригада жангчилари Донецк яқинидаги Авдийивка шаҳрини Россия босқини бошланганидан буён ҳимоя қилмоқда. Сўнгги ойларда РФ қуролли кучлари бу йўналишга йирик захираларни тўплади ва мустаҳкамланган шаҳарни қуршовга олишга уринмоқда. Аммо рус қўшини 59-бригаданинг шаҳар жанубидаги позицияларини ёриб ўта олмади.