Интернет блокланиши туфайли энг кўп зарар кўрган давлатлар эълон қилинди

2023 йилда Россия иқтисодиёти интернет блокланиши туфайли 4,2 миллиард доллардан кўпроқ зарар кўрди. Январ ойида эълон қилинган Top10VPN халқаро лойиҳаси ҳисоботига кўра, интернетнинг атайлаб ўчирилиши ва сайтларнинг блокланиши туфайли Россия энг кўп зарар кўрган давлатлар рўйхатида биринчи ўринни эгаллади. 2022 йил якунига кўра ҳам Россия ушбу рўйхатда биринчи бўлган эди.

2023 йилда интернет тармоғининг ўчирилиши ва блокланишидан жаҳон иқтисодиётига етказилган жами зарар 9,01 миллиард долларга баҳоланмоқда. Россиядан кейин энг кўп зарар кўрган мамлакатлар ичида Эфиопия (1,59 миллиард доллар), Эрон (920,3 миллион доллар), Мянма (859,4 миллион доллар) ва Ҳиндистон (585,4 млн. доллар) бор.

Ўзбекистон 2023 йилги рейтингда қайд этилмади. 2022 йилги рейтингда эса 5-ўриндан жой олиб, молиявий зарар миқдори 219,7 млн долларга тенг бўлган эди.

Ҳисоботда, шунингдек, 2023 йил давомида 25 мамлакатда 196 марта интернет қасддан ўчирилгани қайд этилган, бунда 747 миллион киши зарар кўрган. Интернет кўпинча Ироқда узилган (66 марта). Интернетнинг энг узоқ вақт узилиши Ҳиндистоннинг Манипур штатида юз берган: 200 кундан ортиқ. Қайд этилишича, интернет блокланиши ҳолатларининг ярми инсон ҳуқуқларининг поймол этилиши, биринчи навбатда, намойишлар эркинлигини чеклаш билан боғлиқ.

Top10VPN 2019 йилдан бери Жаҳон банки, Халқаро электр алоқа иттифоқи, Евростат маълумотлари ва бошқа маълумотлар асосида интернетнинг ўчирилиши, секинлаштирилиши ва блокланиши натижасида иқтисодиётга етказилган зарарни ҳисоблаб келади.