Францияда Ле Пен партияси Россия билан алоқалари учун судга берилди

Франциянинг «Радикал сўл партия»си Марин Ле Пеннинг ўнг қанот популист «Миллий бирлашув»ини «хорижий куч билан махфий алоқалар» ва «хорижий кучга маълумот узатиш»да айблаб, судга берди. Бу ҳақда 15 январ, душанба куни AFP хабар тарқатди. 

«Хорижий куч» деганда Россия назарда тутилган. «2014 йилдан, «Миллий фронт» («Миллий бирлашув» 2018 йилгача шундай номланган) Путинга яқин тузилмадан қарз олганидан бери партия ва унинг раҳбарияти коррупцияга учраган ҳамда Франция ва бутун Европада Россия ташвиқотини тарқатишга ундаган», - дея маълум қилди «Радикал сўл партия». 

Франциянинг сўл радикаллари қатор журналистик суриштирувларга таяняпти. Хусусан, декабр ойида The Washington Post газетаси Европа махсус хизматларидан бирининг ҳужжатларига таяниб, Кремл Францияда Украинани қўллаб-қувватлашни камайтиришга ва бу мамлакатда Россия Федерацияси билан яқинлашиш тарафдорлари сонини кўпайтиришга уринаётгани, француз ахборот соҳасидаги ташвиқотни рағбатлантираётгани ҳақида ёзган эди. WP материалига кўра, бу борада Ле Пен партияси муҳим рол ўйнаши керак.

Француз ўнг қанот популистларига Россия кредити 

«Миллий фронт» «Биринчи Чехия-Россия банки»дан (БЧРБ) 2014 йил сентябрида, Қримдаги воқеалардан бир неча ой ўтиб кредит олган, Ле Пен буни қонуний ҳаракат деб атаган. 2016 йилда БЧРБ банкрот деб эълон қилинди ва Россия Федерацияси Марказий банки унинг лицензиясини бекор этди. Ўшанда кредитга бўлган ҳуқуқлар чет элда авиатехникага хизмат кўрсатиш билан шуғулланадиган Россиянинг «Авиазапчаст» АЖга ўтди. 

Ўнг қанот популистлари кредитни 2019 йил сентябригача тўлаши керак эди, аммо Le Parisien газетасига кўра, улар бунинг учун пул топа олмади. «Миллий бирлашув» (янги ном остида) фақат 2022 йил апрел ойидан бошлаб кредитни тўлашни бошлади. Энди француз матбуотига кўра, Ле Пен партияси 2028 йилгача ҳар уч ойда ўртача 322 минг евро тўлаши керак бўлади.

Ле Пеннинг партияси Кремлга алоқадор деб кўрилади

2023 йил июн ойида Франция парламенти Тергов комиссиясининг ҳисоботи эълон қилинди, унда «Миллий бирлашув» Россия Федерациясининг «узатиш камари»га айланиб, ўз риторикасида «русча формулалар»ни такрорлаётгани билдирилган. Хусусан, партиянинг Қрим ҳақидаги баёнотлари «Путин расмий формулаларини сўзма-сўз такрорлади», дейилади ҳисоботда. Унинг муаллифлари, шунингдек, Марин Ле Пеннинг партия раислигига келиши Россия билан «мафкуравий ва сиёсий яқинлашув стратегиясини тезлаштирганини» таъкидлаган.

Ле Пеннинг ўзи 2023 йил май ойидаги парламент эшитувларида «ҳеч қачон чет эл таъсири остида бўлмагани» ва Россия банкидан кредит «сиёсий мажбуриятларсиз» олингани, бу ўша пайтда француз банклари «Миллий фронт»га қарз беришни истамагани учун қилинганини айтди. Бундан ташқари, у кредит аллақачон тўланганлигини билдириб ўтди.

2022 йилги Франциядаги президентлик сайловларида Ле Пен иккинчи турга чиқди ва 41 фоиз овоз олиб, амалдаги давлат раҳбари Эммануэл Макронга ютқазди.