Қашқадарёда яна бир эрта унаштирув тўхтатилди

Қашқадарё вилояти Шаҳрисабз туманида икки йил олдин, 15 ёшида унаштирилган қиз унга йигит томонидан турли босимлар ўтказилганини айтган. У мазкур масалада Болалар омбудсманига мурожаат қилгани ва ҳозирда ҳолат ташкилот назоратига олингани маълум қилинди.

«М.М.нинг айтишича, ҳозирда у университетнинг 1-курсида ўқимоқда ва ўқишини давом эттириш ниятида. Бир неча йилдан буён таниши бўлган О.Б. (йигит) унга турмушга чиқишига ундаб, турли шаклда босим ўтказиб келмоқда. О.Б. ва М.М.нинг ота-оналари ўзаро келишиб, қизнинг розилигисиз унаштирув маросимини ўтказган бўлиб, ҳозирда О.Б. томонидан унга турмушга чиқишга ундаб, руҳий босим ўтказилмоқда», дейилади хабарда.

Қиз Kun.uz мухбири билан суҳбатда айтишича, уни 2 йил аввал – ҳали 15 ёшлигида унаштириб қўйишган.

«Мен ҳали ўқишни, ўз соҳамда ўрнимни топишни истайман. Кейинги вақтларда унга нисбатан ҳам фикрим ўзгарганини сезганидан кейин менга нисбатан турли босимлар, таҳдидлар қила бошлади. Агар унга тегмасам ўз жонига қасд қилишини айтиб қўрқитди. Ҳаттоки ижарада яшайдиган квартирамизга келиб жанжал кўтаради», дейди у.

Айни пайтда ҳолат Болалар омбудсмани, прокуратура ва ички ишлар органлари томонидан ўрганилиб, қизга ҳимоя ордери берилган. Унинг ота-онасига эса қизини турмушга чиқишга мажбурлаш жиноий жавобгарликка асос бўлиши ва бунинг ҳуқуқий оқибатлари тушунтирилган.

• Маълумот учун, Маъмурий жавобгарлик тўғрисидаги кодекснинг 47−3-моддасига (Никоҳ ёши тўғрисидаги қонунчиликни ёки никоҳ тузиш тартибини бузиш) кўра, ушбу ҳуқуқбузарлик БҲМнинг 5 бараваридан 10 бараваригача миқдорда жарима солишга сабаб бўлади. Аёлни эрга тегишга мажбур қилиш ёки унинг эрга тегишига тўсқинлик қилганлик учун эса Жиноят кодексининг 136-моддасига кўра, жарима, ахлоқ тузатиш ишлари, 3 йилгача озодликдан чеклаш ёки озодликдан маҳрум қилиш жазолари белгиланган.
• Бундан аввалроқ, Қашқадарё вилоятида қизларнинг эрта унаштириш ҳолатлари акс этган видеолар муҳокамалар марказида бўлган эди.