Ўзбекистон Қонунчилик палатаси спикери Россияга ташриф буюради

Ўзбекистон парламенти делегацияси расмий ташриф билан Россия Федерациясида бўлади.

Фото: Kun.uz

Жорий йилнинг 19-20 феврал кунлари Ўзбекистон Олий Мажлиси Қонунчилик палатаси спикери Нуриддин Исмоилов бошчилигидаги парламент делегацияси Россия Федерациясида бўлади.

Ташриф дастурига мувофиқ, Ўзбекистон парламенти делегациясининг Россия Давлат думаси раиси Вячеслав Володин ҳамда Россия Федерацияси Федерал мажлиси Федерация кенгаши раиси Валентина Матвиенко билан учрашувлари режалаштирилган.

Бўлажак учрашувларда парламентлараро алоқаларни кенгайтириш ва мустаҳкамлаш, бу йўналишдаги ҳамкорликни кучайтириш масалаларига эътибор қаратилади.

Шунингдек, Ўзбекистон Олий Мажлиси Қонунчилик палатасининг Россия Федерацияси Федерал мажлисининг Давлат думаси билан ҳамкорлик бўйича парламентлараро комиссиясининг биринчи мажлиси бўлиб ўтиши назарда тутилган.

Мазкур ташриф Россия парламенти делегация аъзоларининг Олий Мажлис Қонунчилик палатаси (2022 йил, ноябр)да бўлиб ўтган учрашуви давомида режалаштириб олинган.